الەمنىڭ تالقىسىنا تۇسكەن سۋرەت
استانا. قازاقپارات - كانادادا وتكەن «ۇلكەن جەتىلىكتىڭ» ءسامميتى «قىرىق كىسى ءبىر جاق، قىڭىر كىسى ءبىر جاق» بولعان كەزدەسۋ ءساتسىز اياقتالعانى بەلگىلى.
ا ق ش- تىڭ ايبارىنان ىقپاعان جەتىلىككە مۇشە ەلدەر وسى سامميتتە دونالد ترامپتىڭ ۇستانىپ وتىرعان ساياساتىنا قارسىلىعىن اشىق ايتتى. ءبىز بۇل تۋرالى («ۇلكەن جەتىلىك» G6+1 - گە اينالا ما؟ ) ماقالامىزدا كەڭىنەن جازدىق. ەندى وعان توقتالىپ وتىرۋدىڭ كەرەگى جوق.
باتىس باسپا ءسوزى مەن الەمدىك ينتەرنەت كەشەلى - بەرى ءبىر- اق ماسەلەگە نازار اۋدارىپ وتىر. بىرىنشىدەن، ا ق ش- تىڭ وسى سامميتتە جولى بولماعانى جانە ەڭ باستىسى نەمىس فوتوگرافى تۇسىرگەن سۋرەت. وندا دونالد ترامپ قولىن ايقاستىرىپ، ستولدا وتىر دا، قارسى بەتتە نەگىزىنەن ەۋروپالىق ۇيىمعا مۇشە ەلدەردىڭ باسشىلارى تۇر. باستى پلانعا نەمىس كانسلەرى انگەلا مەركەل شىققان، ونىڭ جانىندا فرانسيا پرەزيدەنتى ەمممۋانەل ماكرون تۇر. ال ا ق ش پرەزيدەنتىنىڭ قاسىندا ونىڭ كەڭەسشىسى دجون بولتون تۇر. تراپمتىڭ كەڭەسشىسىنىڭ قاسىندا جاپونيا پرەمەرى سيندزو ابە قولىن ايقاستىرا قاراپ تۇر.
انگەلا مەركەل ۇكىمەتىنىڭ فوتوگرافى تۇسىرگەن بۇل سۋرەت قازىر الەمدىك يەنتەرنەت پەن الەۋمەتتىك جەلىلەردى ارالاپ كەتتى. قازىر بۇكىل ساياساتتى بىلەتىن ءارى ءسوز ايتا الاتىنداردىڭ بارلىعى وسى سۋرەتتى تالقىعا سالىپ جاتىر. ءتىپتى وسى فوتونىڭ نەگىزىندە ارنايى شارج سالعاندار دا كوبەيدى. G7 ءسامميتى ەۋرورپانىڭ بۇرىنعىدان دا بىرىگىپ كەلە جاتقانىن، ا ق ش- تىڭ گەگوموندىق ساياساتىنىڭ جۇرمەيتىنەن پاش ەتىپ تۇرعانداي. ناقتى ايتقاندا، ەۋرووداقتىڭ ءوزى ا ق ش- تان ىرگەسىن اۋلاق سالا باستادى. ءسامميتتىڭ ەكىنشى كۇنىندەگى وتىرىسقا قاراماي سينگاپۋرگە كيم چەن ىنمەن كەزدەسۋگە اسىعىپ كەتكەن دونالد ترامپتىڭ قازىرگى ساياساتتاعى بەينەسىنىڭ قانداي ەكەنىن وسى سۋرەت اڭعارتىپ- اق تۇرعانداي.
- مىڭ ءسوزدى بەرەتىن ءبىر سۋرەت، - دەپ جازدى USA Today باسىلىمى.
- بۇل فوتودا دونالد ترامپ قورعانىش كەيپىندە وتىر. بۇل انگەلا مەركەلدىڭ قاتاڭ مىنەزى مەن ترامپتىڭ السىزدىگىن ايعاقتايتىن فوتو، - دەدى Time گازەتى.
- پرەزيدەنت دونالد ترامپ ءوزىنىڭ ارەكەتىنە ەسەپ بەرە الماي وتىرعان بالا سياقتى، ال مەركەل بۇل جەردە قاتال ءمۇعالىمنىڭ وبرازىندا تۇر، - دەپ جازدى Wil This Never End - ءنىڭ قولدانۋشىسى.
- ءبىز ءبارىمىز دە مەرەيى ۇستەم انگەلا مەركەلمىز، - دەپ جازدى Denizcan Grimes.
الايدا دونالد ترامپتىڭ كەڭەسشىسى دجون بولتوننىڭ بۇل فوتوعا قاتىستى بايلامى باسقا. «پرەزيدەنت ترامپ بۇل سامميتتە ءوزىنىڭ پوزيتسياسىن اشىق ءبىلدىردى. بوس ءسوزدىڭ قاجەتى جوق» - دەپ قىسقا قايىردى كەڭەسشى.
رەسەي سىرتقى ىستەر مينيسترلىگىنىڭ ارناۋلى وكىلى ماريا زاحاروۆا «سوڭعى كەزدە كەلىسسوزدەردەن گورى فوتوجۋرناليستيكا سىرتقى ساياساتتا بيىكتى باعىندىرۋدا. مەن بۇل سۋرەتتى ءبىرىنشى كورگەن ساتتە فوتوشوپ دەپ ويلادىم. سويتسەم، ءسامميتتىڭ جارقىن شىنايى كورىنىسى ەكەن. ارينە، «ۇلكەن جەتىلىكتىڭ» كەزدەسۋى جابىق ەسىك جاعدايىندا ءوتتى. ءبىراق ول ماسەلە ەمەس. تۇسىرىلگەن ءبىر كادر بۇكىل شىنايى جاعدايدى كورسەتىپ تۇر» دەپ مالىمدەدى ول.
ءيا، راسىندا قاس- قاعىم ءسات. ءبىر كادر. ءبىراق بۇكىل ساياساتتى سىيعىزىپ تۇر...
بەرىك بەيسەن ۇلى
«ايقىن»
