يليا يلين ۇلكەن سپورتقا قايتا ورالدى

ناقتىراق ايتقاندا، يليا يليندى سپورتتان شەكتەتۋ مەرزىمى 2018 -جىلدىڭ 10- ماۋسىمىندا اياقتالعان.

«10 - ماۋسىمدى مەن وتە كوپ كۇتتىم. مەن 24 - مامىردا وتىز جاسقا تولعان ەدىم. مامىر ايىندا وتىزعا تولىپ، قۋانىشقا بولەنگەنىممەن كەشە كۇش پەن ەموتسيام قايتا كوتەرىلدى. سەبەبى، مەن ءوزىمنىڭ سۇيىكتى ىسىمە قايتا ورالدىم. وسى ۋاقىتقا دەيىن ەڭسەم ءتۇسىپ جۇرگەنىمەن، ال كەشە ءوزىمدى ەركىن سەزىنگەنىمدى ءبىلدىم. كەزەكتى رەت وزىمە ءالى دە اۋىر اتلەتكە تويماعانىمدى دالەلدەدىم. ماعان زىلتەمىر كوتەرگەن ۇنايدى. مەنى قولداعان بارلىق وتانداستارىمدى وسى قۋانىشىممەن بولىسكىم كەلەدى»، - دەيدى سپورتشى و ك ق- دا وتكەن باسپا ءسوز ءماسليحاتىندا.

يليا يلينن سونداي- اق ەڭ الدىمەن كىمگە العىس بىلدىرگىسى كەلەتىنىن ايتتى.

 «ەڭ الدىمەن، البەتتە، حالىق جانە پرەزيدەنت. ءبىراق، بۇگىن پرەزيدەنتتى نۇرسۇلتان ءابىش ۇلى نازاربايەۆقا - ءوزىمنىڭ رۋحاني اكەمە راحمەت ايتقىم كەلەدى. وتە كۇردەلى كەزەڭدە - وتكەن جىلى ءبىز ەكسپو- دا كەزدەستىك. ول مەنى وزىنە تارتىپ: «ەش ۋايىمداما. سەن مەن ءۇشىن چەمپيونسىڭ. ءبارى ويداعىداي بولادى. مەن ساعان سەنەمىن» دەپ قولداۋ ءبىلدىردى. مىنە، وسى ءسوزى مەنى قاناتتاندىردى. البەتتە، ماعان قولداۋ بىلدىرگەن بارلىق ادامدارعا زور العىسىمدى بىلدىرەمىن»، - دەدى يليا يلين.

يليا يلين ءوزىنىڭ الداعى ۋاقىتتاعى جوسپارلارىمەن ءبولىستى، دەپ حابارلايدى قازاقپارات ءتىلشىسى.

«بولاشاق جوسپارلارىم تۋرالى ايتىپ وتكىم كەلەدى. قازىرگى دەنە قالپىمنىڭ كۇيى جامان ەمەس. سالماعىم - 101-103 كەلى ارالىعىندا. ءبىز سالماق كاتەگوريالارىن كۇتىپ وتىرمىز. ياعني، ءبىر ايدان كەيىن الەمدىك اۋىر اتلەتيكادا قانداي سالماقتا ونەر كورسەتەتىنىم بەلگىلى بولادى»، - دەيدى سپورتشى و ك ق- دا وتكەن باسپا ءسوز ءماسليحاتىندا.

سپورتشى قازىرگى ۋاقىتتا سالماقتى نە ءوسىرىپ، نە كەمىتىپ الماۋدى باقىلاپ جۇرگەن كورىنەدى.

«جۇمادا جۇلقي كوتەرۋدە 172 كەلىنى، سەرپە كوتەرۋدە 212 كەلىلىك كورسەتكىشتى كورسەتتىم. قازىرگى كەزەڭدە جاعداي جاقسى. باپكەرىمنىڭ ماعان كوڭىلى تولىپ وتىر. البەتتە، 22 جىلدىق سپورتتىق مانسابىم بولعاندىقتان، اياققا سالماق ءتۇسىپ، جاراقات الىپ قالاتىن كەزدەرىم بار. بۇل البەتتە قالىپتى نارسە. ءبىراق، جالپى مەنىڭ ويىمشا، جاعدايىم 90 پايىزعا جاقسى. ارى قاراي جاقسارا بەرەدى دەگەن ويدامىن»، - دەيدى ول.

يليننىڭ ايتۋىنا قاراعاندا، قىركۇيەك ايىندا قازاقستان چەمپيوناتى بولادى.

«مەن سوندا ونەر كورسەتۋگە بەل بۋىپ وتىرمىن. بارىنە دە شارت بىردەي: بارلىعىمىز قازاقستان چەمپيوناتىنان ءوتىپ، الەم چەمپيوناتىنا بارۋىمىز كەرەك. سول سىنداردى باعىندىرساق، توكيو وليمپياداسىنا ليسەنزيانى الامىز. ازىرگە ماقساتىم - قازاقستان چەمپيوناتىن ۇتۋ. تولىق دايىنمىن. جەڭىستى قالايمىن. ماعان تەك جەڭىس كەرەك»، - دەدى يليا يلين.

اۆتور: ايان بەكەن ۇلى