ترامپ كيم چەن ىنمەن كەزدەسۋ كۇتكەندەگىدەي بولماسا، ورتادان ۇزەتىنىن دە ەسكەرتتى
استانا. قازاقپارات - ا ق ش پرەزيدەنتى دونالد ترامپ سولتۇستىك كورەيا باسشىسى كيم چەن ىنمەن كەزدەسۋىنە دايىندىق اياقتالىپ قالعانىن جانە 12 - ماۋسىمدا سينگاپۋرداعى سامميتكە بارلىعى دايىن ەكەنىن مالىمدەدى.
ترامپ بۇل تۋرالى ۆاشينگتوندا جاپونيا پرەمەر- ءمينيسترى سيندزو ابەمەن كەلىسسوزىندە ايتتى. ونىڭ سوزىنشە، سولتۇستىك كورەيا باسشىسىمەن سامميت سولتۇستىك- شىعىس ازيا تاريحىنداعى جاڭا، «بەتبۇرىس كەزەڭى» بولادى جانە سولتۇستىك كورەيانىڭ بولاشاعىن جارقىن ەتەدى.
ا ق ش پرەزيدەنتى سونىمەن قاتار ەگەر كەلىسسوز جاقسى وتەتىن بولسا كيم چەن ىندى ا ق ش- قا ساپارلاپ قايتۋعا شاقىراتىنىن دا ايتتى. ول ەگەر كەلىسسوز كۇتكەندەگىدەي بولماسا، كەزدەسۋدى ورتادان ۇزەتىنىن دە ەسكەرتتى.
مامىردىڭ سوڭىندا ترامپ كيم چەن ىنمەن ءبىرىنشى رەت وتەيىن دەپ وتىرعان كەزدەسۋدەن باس تارتاتىنىن جاريالاعان ەدى. ۇزاماي سولتۇستىك كورەيا باسشىسى ا ق ش پرەزيدەنتىنە حات جازىپ، ترامپ ويىن وزگەرتكەن جانە سامميتكە دايىندىق قايتا باستالعان.
سامميتتىڭ باستى ماسەلەسى - سولتۇستىك كورەيانىڭ يادرولىق باعدارلاماسى بولماق. ۆاشينگتون پحەنياننان يادرولىق قارۋىنان ەشقانداي شارتسىز باس تارتۋىن تالاپ ەتىپ وتىر. كيم چەن ىن كورەي تۇبەگىن يادرولىق قارۋدان ارىلتۋ بىرتىندەپ جۇرگىزىلۋى ءتيىس جانە ەسەسىنە ا ق ش تاراپىنان جەڭىلدىكتەر جاسالۋى كەرەك دەگەنىنەن تانبايدى.
www.azattyq.org
