عالىمدار كەشكى ۋاقىتتا كومپيۋتەر الدىندا وتىرۋدىڭ زيانىن انىقتادى
استانا. قازاقپارات - گارۆارد ۋنيۆەرسيتەتى قىزمەتكەرلەرىنىڭ جەتەكشىلىگىندەگى عىلىمي توپ كەشكى ۋاقىتتا كومپيۋتەرلەر مەن پلانشەتتەردى شامادان تىس قولدانۋ ۇيقىنىڭ بۇزىلۋى مەن اعزانىڭ تاۋلىكتىك جۇمىس رەتىنىڭ اۋىتقۋىنا الىپ كەلەتىنىن انىقتادى، دەپ حابارلايدى Physiological Reports باسىلىمى.
عالىمدار ارنايى ەكسپەريمەنت جۇرگىزىپ، ونىڭ بارىسىندا سىناققا تۇسەتىن ازاماتتارعا بەس كۇن بويى كەشكى ۋاقىتتى كومپيۋتەر الدىندا وتكىزۋ جانە ءدال سونداي ۋاقىتتا كىتاپ، گازەت- جۋرنال جانە باسقا دا باسىلىمداردى وقۋمەن اينالىسۋ ۇسىنىلدى. زەرتتەۋگە 22-28 جاس ارالىعىنداعى ەر ادامدار مەن ايەلدەر قاتىستى.
الىنعان ناتيجەلەرگە سايكەس، كومپيۋتەر، تەلەفون نەمەسە پلانشەت سەكىلدى جارىق ءبولۋشى گادجەتتەردى قولدانۋ ۇيقىعا كەتۋ جىلدامدىعىنا كەرى اسەر ەتەدى. وسىلايشا، زەرتتەۋگە قاتىسۋشىلار ەلەكترونيكانى پايدالانعان تۇندەرى ولار ادەتتەگىدەن جارتى ساعاتقا كەش ۇيىقتاعاندارىن مالىمدەگەن. سونىمەن قاتار، ولار كۇنى بويى ۇيقىسىراپ جۇرگەندەرىن، ال كەشكى ۋاقىتتا، كەرىسىنشە، وزدەرىن تىم سەرگەك سەزىنگەندەرىن ايتقان.
عالىمدار، سونداي- اق، گادجەتتەردى قولدانۋ ۇيقى مەن سەرگەكتىك كەزەڭىنە جاۋاپ بەرەتىن مەلاتونيننىڭ شىعارىلۋىن باسەڭدەتەتىنىن انىقتادى.
«الىنعان مالىمەتتەر جارىق ءبولۋشى ەلەكتروندى قۇرىلعىلار اعزاعا بيولوگيالىق ىقپال ەتەتىنە دالەلدەر ۇسىنىپ وتىر» ، - دەدى جۇمىس اۆتورلارىنىڭ ءبىرى جاننا داففي.
Baq.kz
