استانادا قىسقا مەرزىمدى كۋرستاردا ءبىرقاتار تەحنيكالىق ماماندىقتار قازاق تىلىندە وقىتىلادى
بۇل تۋرالى استانادا قازاقستان پرەزيدەنتى نۇرسۇلتان نازاربايەۆتىڭ قاتىسۋىمەن «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسى كەزىندە ەلوردا اكىمى اسەت يسەكەشەۆ ءمالىم ەتتى، دەپ حابارلايدى قازاقپارات ءتىلشىسى.
«پارتيانىڭ استانا قالالىق فيليالىمەن جۇزەگە اسىرىلىپ جاتقان جوبالار باعىتىنىڭ ءۇش توبى تۋرالى ايتۋعا رۇقسات ەتىڭىزدەر. بارلىق جوبالار پارتيانى جاڭعىرتۋدىڭ بازالىق قاعيداتتارىنا، «رۋحاني جاڭعىرۋ» باعدارلاماسىنىڭ باسەكەگە قابىلەتتىلىك، پراگماتيزم، ءبىلىم كۋلتى باعىتتارىنا سۇيەنىپ، حالىقتىڭ جاليى تۇرمىسىن، ءومىر ساپاسىن جاقسارتۋعا باعىتتالعان»، - دەيدى پارتيانىڭ استانا قالالىق فيليالىنىڭ ءتوراعاسى.
جوبالاردىڭ ءبىرىنشى توبى تۋرالى ايتقان اكىم جۇمىسپەن قامتۋدىڭ جاڭا ساياساتى سالاسىنداعى قولجەتىمدى ءبىلىم بەرۋگە باسا ماڭىز بەرىلەتىنىن ءسوز ەتتى.
«ءوزىڭىز تاپسىرعانداي، پارتيانىڭ ەڭ باستى مىندەتتەرىنىڭ ءبىرى - حالىقتىڭ تابىسىنىڭ ءوسىمى. بۇگىنگى تاڭدا ستاتيستيكاعا سايكەس استانادا 500 مىڭ ادام جۇمىسپەن قامتىلعان. ونىڭ 300 مىڭى شاعىن جانە ورتا بيزنەس سالاسىندا. ءبىزدىڭ ەسەپتەۋىمىزشە، 2023 -جىلعا قاراي حالىق سانىنىڭ وسۋىنە بايلانىستى استانادا جۇمىس ىستەيتىن ادامداردىڭ سانى 650 مىڭعا جەتەدى. دەمەك، تاعى 150 مىڭ جاڭا جۇمىس ورنىن اشۋ كەرەك. پارتيالىق جوبالار ەڭ الدىمەن ادامداردى جاڭا تەحنولوگيالىق تالاپتارعا ساي ەتۋدى كوزدەيدى. ول ءۇشىن ءبىز «بيگ داتا» جوباسى ارقىلى قالالىق تاپسىرىستان ەسكىرگەن ماماندىقتاردى الىپ تاستاپ، قالالىق شارۋاشىلىق ءۇشىن قاجەتتى ماماندىقتاردىڭ ءتىزىمىن جاسادىق. ولار ليفتتەر بويىنشا جۇمىس اتقاراتىن ينجەنەرلەر، گازداندىرۋ سالاسىنداعى ماماندار، قازاق ءتىلى، اعىلشىن ءتىلى جانە گەوگرافيا پاندەرى بويىنشا مۇعالىمدەر جانە بۇگىنگى تاڭدا جەتىسپەي وتىرعان وزگە دە ماماندىقتار»، - دەدى ول.
اسەت يسەكەشەۆتىڭ ايتۋىنشا، سونىمەن قاتار، جوعارى تەحنولوگيالى ماماندىقتار - اقپاراتتىق- مودەلدەنگەن قۇرىلىس جانە جوبالاۋ، كيبەرقاۋىپسىزدىك، كولىك، مەديتسينا، ءبىلىم سالاسىنداعى ماماندىقتارعا گرانتتار بولىنبەك.
«وسىعان بايلانىستى قالانىڭ مەملەكەتتىك تاپسىرىسىن تولىعىمەن قايتا قارادىق. ءبىز الدىمەن جوعارى جانە ورتا بىلىمگە تاپسىرىستاردى ۇلعايتامىز. ەكىنشىدەن، قىسقا مەرزىمدى كۋرستار جاساقتالىپ، اسىرەسە ول كۋرستار جۇمىسشى جاستار ءۇشىن ول ىڭعايلى ەتۋ ماقساتىندا كەشكە جانە دەمالىس كۇندەرى وتەتىندەي ەتىپ بەلگىلەدىك. بيىل باعدارلامانىڭ باستالۋى اياسىندا 30 مىڭ ەلوردا تۇرعىنى وقىتىلادى. ولاردىڭ 17 مىڭى مەملەكەتتىك تاپسىرىس اياسىندا ءبىلىم الادى. بيىل سونىمەن قاتار مەملەكەتتىك تىلدە وقىتۋ 45 پايىزدان 65 پايىزعا ارتاتىنىن ايتا كەتكىم كەلەدى. اتاپ ايتقاندا، اقپاراتتىق-مودەلدەنگەن قۇرىلىس جانە جوبالاۋ، مەديتسينالىق وپتيكا، مەديتسينالىق تەحنيكانى جوندەۋ جانە پايدالانۋ جانە وزگە دە تەحنيكالىق ماماندىقتار قازاق تىلىندە وقىتىلادى»، - دەدى اسەت يسەكەشەۆ.
ەسكە سالا كەتسەك، استانادا بۇگىن قازاقستان پرەزيدەنتى نۇرسۇلتان نازاربايەۆتىڭ قاتىسۋىمەن «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسى ءوتىپ جاتىر. شارا بارىسىندا «نۇر وتان» پارتياسىن جۇيەلى تۇردە جاڭعىرتۋ بويىنشا جۇمىس بارىسى تالقىلانىپ، قازاقستان پرەزيدەنتىنىڭ بەس الەۋمەتتىك باستاماسىن جۇزەگە اسىرۋ باعىتىندا قوعامدىق باقىلاۋدى ۇيىمداستىرۋ ماسەلەلەرى قارالۋدا.
