ەلباسىنا بەرگەن ۋادە: يۋليا دروبيازكو قازاق جىگىتىنە تۇرمىسقا شىعىپ، بالا تاربيەلەۋدە
وندا 2005 -جىلى ەلباسىنىڭ الدىندا سويلەگەن سوزىندە قازاق ازاماتىنا تۇرمىسقا شىعۋعا ۋادە بەرگەن يۋليا دروبيازكو ءسوز الىپ، بۇگىنگى ءومىرى تۋرالى ايتتى. سونداي-اق ول «قازاق تانۋ» جوباسىنا قولداۋ بىلدىرەتىنىن جەتكىزدى، دەپ حابارلايدى قازاقپارات ءتىلشىسى.
سەسسيا جۇمىسىنا وڭتۇستىك قازاقستان وبلىسىنىڭ اكىمى، وبلىستىق قازاقستان حالقى اسسامبلەياسىنىڭ ءتوراعاسى جانسەيىت تۇيمەبايەۆ، ەتنومادەني بىرلەستىكتەر ءتوراعالارى مەن مۇشەلەرى، قالا-اۋدان اكىمدەرى مەن وبلىستىق ءماسليحات دەپۋتاتتارى، زيالى قاۋىم وكىلدەرى مەن جاستار قاتىستى.
ايماق باسشىسى قازاقستان حالقى اسسامبلەياسىنىڭ ХХVI سەسسياسىندا ەلباسى نۇرسۇلتان نازاربايەۆ جۇكتەگەن ءبىرقاتار مىندەت- ماقساتتاردىڭ وبلىستا جۇزەگە اسىرىلۋ بارىسىنا توقتالدى.
«بۇگىنگى اسسامبلەيا - ميلليونداعان قازاقستاندىقتى ورتاق ماقساتقا جۇمىلدىرعان، اسقاق ارمانعا جەتەلەگەن، ءبىر مۇددەگە توعىستىرعان الىپ كۇش. ادام تاعدىرى وتانىمەن تامىرلاس كەلەدى. ەلىمىزدىڭ گۇلدەنگەنى ءاربىرىمىزدىڭ مەرەيىمىز. بۇگىنگى سەسسيادا ەلباسىنىڭ بەس الەۋمەتتىك باستاماسىن وبلىستا ىسكە اسىرىلۋى سارالانادى. بۇل بايىپتى باستامالار - الەۋمەتتىك مەملەكەت قۇرۋدى كوزدەيدى. ول اربىرىمىزگە الەۋمەتتىك جاۋاپكەرشىلىك جۇكتەپ، اۋىزبىرلىگىمىزدى ودان ءارى بەكەمدەۋگە جەتەلەيدى. قازاقستاندىقتار تاۋەلسىزدىك بەرگەن تولاعاي تابىستارعا كۋا. وسى جىلدارداعى باستى جەتىستىگىمىز - بيىل 20 جىلدىعى اتالىپ وتىلەتىن ەڭسەلى ەلوردامىز. ۇلىستىڭ ۇيىتقىسى، سالت- سانانىڭ ارقاۋ ورداسى بولىپ تانىلعان وڭتۇستىك ءوڭىرى دە وسى كەزەڭ ىشىندە بەلدى بەلەستەردى باعىندىرىپ، تولايىم تابىستارعا جەتتى. التىن قۇرساقتى ايماق تۇرعىندىرىنىڭ سانى تاۋەلسىزدىك جىلدارىندا ميلليونعا ارتسا، شىرايلى شىمكەنتىمىز ميلليوندىق بەلەستى باعىندىردى»، - دەدى وبلىس اكىمى.
اسسامبلەيانىڭ ХХVI سەسسياسىندا كوتەرىلگەن «قازاق تانۋ» جوباسىنا قاتىستى «سەسنابانك» ا ق قىزمەتكەرى جانە قازاق كەلىنى يۋليا دروبيازكو ءوز پىكىرىن ءبىلدىردى.
«مەن، يۋليا دروبيازكو. جۇرەگىم كەڭ- بايتاق قازاق دالاسىن وتانىم دەپ بىلەتىن ورىس قىزىمىن. بۇگىندە بەرەكەلى قازاق وتباسىنىڭ ءتۇتىنىن تۇتەتىپ وتىرعان يناباتتى كەلىن ءارى 2 بالانىڭ ارداقتى اناسىمىن. 2005 -جىلى ەلباسى نۇرسۇلتان نازاربايەۆ وبلىسقا جاساعان ساپارى اياسىندا وبلىس جاستارىمەن جۇزدەستى. اتالعان جيىندا پرەزيدەنتتىڭ جانىندا ءسوز سويلەۋ قۇرمەتىنە يە بولدىم. بۇكىل ەل الدىندا ەلباسىعا بولاشاقتا قازاق جىگىتىنە تۇرمىسقا شىعىپ، قازاقتىڭ سانىن كوبەيتۋگە ۋادە بەردىم. پرەزيدەنتتىڭ الدىندا ءسوز سويلەپ، ۋادە بەرۋ ۇلكەن مارتەبە ءارى جاۋاپكەرشىلىك بولسا، ونى ورىنداۋ مەن ءۇشىن مەرەيلى مىندەت دەپ ءبىلدىم. مىنە، بۇگىندە سول ۋادەمدە تۇرىپ، قازاق جىگىتىنە تۇرمىسقا شىقتىم. جولداسىم - قازاق. بالالارىم قازاق. ءوزىم دە قازاق بوپ كەتكەنمىن. قۇرمەتتى جانسەيىت قانسەيىت ۇلى، بيىلعى اسسامبلەيانىڭ جيىرما التىنشى سەسسياسىندا وڭتۇستىك اتىنان ءسوز سويلەگەن ناتاليا رومانوۆا وندا ءبىرقاتار ماسەلەلەردى ايتىپ، ەلباسى الدىندا قازاقتانۋ ماسەلەسىن كوتەرگەن بولاتىن. مەن ءوزىم بۇل ۇسىنىسقا تولىققاندى كەلىسەمىن جانە قولدايمىن جانە قازاقتانۋ بويىنشا ارنايى باعدارلاما قابىلدانسا دەگەن ويىم بار»، - دەدى يۋليا دروبيازكو.
سەسسيا بارىسىندا وبلىستىڭ قوعامدىق- ساياسي ومىرىنە بەلسەنە قاتىسىپ، قوعامدىق كەلىسىم مەن جالپىۇلتتىق بىرلىكتى قامتاماسىز ەتۋ جونىندەگى مەملەكەتتىك ساياساتتىڭ ىسكە اسۋىنا قوسقان ەلەۋلى ۇلەسى ءۇشىن وبلىس اكىمىنىڭ العىس حاتىمەن وبلىستىق كورەي ەتنومادەني بىرلەستىگىنىڭ ءتورايىمى روزا پاك پەن وبلىستىق گرۋزين ەتنومادەني بىرلەستىگىنىڭ ءتوراعاسى زاال بوچوراشۆيلي ماراپاتتالدى.
ەلباسى ايقىنداعان بەس الەۋمەتتىك باستامانى باتىل ىسكە اسىرۋدى ايتقان وبلىس اكىمى سەسسيانى قورىتىندىلاپ، وبلىستىق باسقارمالار مەن اۋدان، قالا اكىمدىكتەرىنە ءبىرقاتار ناقتى تاپسىرمالار جۇكتەدى. سونىمەن قاتار، اكىم ەتنوستىق توپتار جيناقى تۇراتىن سايرام، ماقتارال، سارىاعاش، تولەبي اۋداندارى مەن تۇركىستان قالاسىندا بيزنەستىڭ الەۋمەتتىك جاۋاپكەرشىلگى اياسىندا «دوستىق» ۇيلەرىن اشۋدى تاپسىردى.
