شىعىس قازاقستاندا جازدا قايدا دەمالۋعا بولادى

استانا. قازاقپارات - بۇگىندە جازعى دەمالىستى قىزىقتى دا دەنساۋلىققا پايدالى وتكىزۋ ءۇشىن شەتەلگە بارۋدىڭ قاجەتى جوق.

ءبىر شىعىس قازاقستان وبلىسىنىڭ اۋماعىندا كوپتەگەن تاماشا دەمالىس بازالارى مەن كەشەندەرى، جاعاجايلار جەتەرلىك.  Аltaynews.kzسايتىنىڭ ءتىلشىسى جاز مەرزىمىندە اسا تانىمال دەمالىس ورىندارى تۋرالى تولىق مالىمەتتەر ۇسىنۋعا تىرىسقان.

الاكول

بيىل الاكولدە دەمالۋشىلار سانى جىلداعىدان ارتا تۇسپەك. سەبەبى بۇل دەمالىس ورنى جاڭارتىلىپ، ءتۇرلى قىزمەت تۇرلەرى پايدا بولدى. ودان بولەك تە كوپتەگەن جاعىمدى جاڭالىقتارمەن قۋانتا الادى.

مۇنداعى تابيعات تۇشى كولىمەن، تازا اۋاسىمەن، تاماشا جاعاجايلارىمەن جانە سۋىنىڭ ەمدىك قاسيەتىمەن تانىمال. الاكولدەگى دەمالىس بازالارىندا بالالاردىڭ ويىن الاڭدارى، بالالار باسسەينى، سپورتتىق ويىندار، بي كەشتەرى، ەكسكۋرسيا، بالىق اۋلاۋ، مونشا، ساۋنا، سۋ اتتراكسيوندارى، كۋرورتتىق- ساناتورييلىك ەم- شارالار سەكىلدى دەمالىس تۇرلەرىن ۇسىنادى. دەمالىس ماۋسىمى الاكولدە 21 -مامىردان باستالىپ، قىركۇيەكتىڭ سوڭىنا دەيىن جالعاسادى.

وسكەمەن قالاسىمەن ارا قاشىقتىعى: 610 شاقىرىم. سەمەيمەن ارا قاشىقتىعى: 660 شاقىرىم. بىركۇندىك دەمالۋ باعاسى ورتاشا ەسەپپەن العاندا ءبىر ادامعا 6000-7000 تەڭگەدەن اينالادى، بۇل سومانىڭ ىشىنە ءۇش ۋاقىت ىستىق تاماعى كىرەدى. باعالار دەمالىس ماۋسىمىنىڭ ءار كەزەڭىنە قاراي وزگەرىپ وتىرادى (ماۋسىم ايىندا باعالار ايتارلىقتاي تومەن) .

جەتۋ جولدارى: پويىز، ۇشاق، اۆتوبۋس، تاكسي جانە جەكە اۆتوكولىك.

15 -ماۋسىمنان باستاپ الاكولگە «وسكەمەن- جالاڭاشكول»، «سەمەي- جالاڭاشكول» باعىتتارى بويىنشا پويىز جۇرە باستايدى. بيلەت باعاسى: پلاسكارت - 2800 تەڭگە، كۋپە - 4000 تەڭگە.

اپتاسىنا ەكى رەت «وسكەمەن- ءۇرجار»، «سەمەي- ءۇرجار» باعىتىندا ۇشاق رەيستەرى بار. بيلەت باعاسى: 10000 تەڭگە.

كۇندە «وسكەمەن- الاكول»، «سەمەي- الاكول» باعىتىندا اۆتوبۋستار جۇرەدى. بيلەت باعاسى: 2600-3000 تەڭگە.

الاكولگە دەيىن تاكسيدىڭ جول اقىسى شامامەن 40-50 مىڭ تەڭگە بولادى. سونداي-اق، وسكەمەن- الماتى تاس جولىمەن جەكە اۆتوكولىكپەن دە شىعۋعا بولادى.

تايىنتى

شىعىس قازاقستاندىقتار اراسىندا اسا تانىمال دەمالىس ورىندارىنىڭ ءبىرى. بۇل جەردە ادامدار جارتاستار مەن قاراعايلى تاۋلار، سۋ تۇپ-تۇنىق كول، قايىڭدى، بۇتالى شوق ورماننىڭ ورتاسىندا دەمالادى. ۇسىنىلاتىن دەمالىس تۇرلەرى: ءدامحانالار، سەرۋەن، سۋعا شومىلۋ، جاعاجاي دەمالىسى، ساڭىراۋقۇلاق تەرۋ، سپورت الاڭدارى. دەمالىس ورنى 2 -ماۋسىمدا اشىلادى.

وسكەمەنمەن ارا قاشىقتىعى: 90 شاقىرىم. بىركۇندىك دەمالۋ باعاسى: تاۋلىگىنە 4000 تەڭگەدەن باستالادى. جەتۋ جولدارى: تاكسي جانە جەكە اۆتوكولىك. تاكسيدىڭ جول اقىسى: وسكەمەننەن 9000 تەڭگەگە جۋىق. جەكە اۆتوكولىكپەن وسكەمەن-سامارا تاسجولى ارقىلى شىعۋعا بولادى.

سىبە كولدەرى

جاز مەزگىلىندە سۇرانىسقا يە تاعى ءبىر دەمالىس ورنى. مۇندا دەمالۋشىلاردى تاماشا تابيعات وزىنە باۋرايدى: ايناداي جارقىراعان كولدەرى، گرانيتتەن تۇراتىن تاۋ سىلەمدەرى، شالعىن ءشوبى مەن بۇتالارى. ۇسىنىلاتىن دەمالىس تۇرلەرى: بالالارعا ارنالعان ويىن الاڭدارى، پيرس، سپورت الاڭدارى. دەمالىس ورنى 4 -ماۋسىمدا اشىلادى.

وسكەمەننەن 78 شاقىرىم جەردە ورنالاسقان. بىرتاۋلىكتىك دەمالۋ باعاسى: تاۋلىگىنە 7000-22000 تەڭگە ارالىعىندا. جەتۋ جولدارى: تاكسي، جەكە اۆتوكولىك. تاكسيدىڭ جول اقىسى: وسكەمەننەن شامامەن 7000-8000 تەڭگە. جەكە اۆتوكولىك: وسكەمەن- العاباس تاسجولى.

وتكەن جىلى دەمالىس ورنىنا ارنايى اۆتوبۋس قاتىنادى. رەيستىڭ قايتا جاندانۋى ازىرگە بەلگىسىز.

دۇبىعالى كولى (وكۋنكي)

تابيعاتى اسەم جەرلەردىڭ ءبىرى: قۇمدى جاعاجاي، جارتاستار، كول، ۇڭگىرلى تاس-تاۋلار. ۇسىنىلاتىن دەمالىس تۇرلەرى: سۋعا شومىلۋ، ءدامحانالار، سەرۋەن، جاعاجايدا دەمالۋ.

وسكەمەننەن ارا قاشىقتىعى: 80 شاقىرىم. باعاسى: تاۋلىگىنە 7000 تەڭگەدەن باستالادى. جەتۋ جولدارى: تاكسي (وسكەمەننەن 7000-7500 تەڭگە) جانە جەكە اۆتوكولىك (وسكەمەن- سەمەي تاس جولى).

بۇقتىرما

شىعىس قازاقستاندا عانا ەمەس، شەتەلدىكتەرگە دە تانىس دەمالىس ورنى. بازالارى 1 -ماۋسىمدا اشىلادى.

وسكەمەنننەن ارا قاشىقتىعى: 76 شاقىرىم. باعاسى: ورتاشا ەسەپپەن ءبىر ادامعا 5000 تەڭگەدەن باستالادى. جەتۋ جولدارى: تاكسي، اۆتوبۋس، پويىز، جەكە اۆتوكولىك.

اپتاسىنا ءۇش رەت «زاشيتا- زىريان» باعىتىندا «جاڭا بۇقتىرما» ستانسياسىنا دەيىن پويىز جۇرەدى. جاڭا بۇقتىرمادان تاكسي نەمەسە پاروم ارقىلى دەمالىس بازالارىنا جەتۋگە بولادى. ازىرشە پويىزدىڭ رەيسكە شىعۋ ۋاقىتى مەن بيلەت باعاسى بەلگىسىز.

سونداي-اق، «وسكەمەن- كوگىلدىر بۇعاز- جاڭا بۇقتىرما- اينا» باعىتىندا كۇندەلىكتى اۆتوبۋس شىعادى. بيلەت باعاسى: 1000 تەڭگە (ناقتى باعاسى 1 -ماۋسىمنان كەيىن بەلگىلى بولادى).

جاڭا بۇقتىرماعا دەيىن تاكسيدىڭ باعاسى 7000-8000 تەڭگە، ارى قاراي دەمالىس بازاسىنا دەيىن ءار شاقىرىمعا 70-100 تەڭگەدەن اينالادى.