قىزىلوردالىق ازامات ءبىر بۇيرەگىن ايەلىنە بەردى

قىزىلوردا. قازاقپارات - قىزىلوردا قالاسىنىڭ تۇرعىنى نۇربەك نۇراددين ءوزىنىڭ ايەلىنە دونور بولدى، دەپ حابارلايدى قازاقپارات ءتىلشىسى.

بۇل ازاماتتىڭ سۇيىكتى جارى ەكى جىلدان استام ۋاقىت بەرى بۇيرەك اۋرۋىنىڭ زاردابىن تارتىپ كەلگەن. ەلىمىزدىڭ كوپتەگەن دارىگەرلەرىنە قارالىپ، دەرتىنە شيپا ىزدەگەنىمەن ەم قونباعان. ناتيجەسىندە دارىگەرلەر بۇيرەك اۋىستىرۋ قاجەت ەكەنىن ايتىپ، دونور ىزدەگەن.

«مەنىڭ ايەلىمنىڭ ەكى بۇيرەگى دە جۇمىس جاساماي قالدى. تەك ءدارى-دارمەكتىڭ كۇشىمەن ءجۇردى. ماماندار مەنىڭ اعزامدى زەرتتەدى. بۇيرەگىم اۋىستىرۋعا جارايتىنىن بىلگەنىمدە قاتتى قۋاندىم. قازىر دەنساۋلىعىم جاقسى. ەشقانداي اۋىرلىق سەزىنگەن جوقپىن. اللاعا شۇكىر، وتا ءساتتى ءوتتى. ەڭ باستىسى، ومىرلىك جارىمنىڭ جاعدايى تۇزەلىپ كەلەدى»، - دەيدى نۇربەك نۇراددين.

قازىر قىزىلوردالىق ازاماتتىڭ ايەلى الماتى قالاسىنداعى كارديولوگيا جانە عىلىمي زەرتتەۋ ينستيتۋتىندا ەمىن جالعاستىرىپ جاتىر، دارىگەرلەردىڭ باقىلاۋىندا. دامەتتىڭ نۇراددينگە دەگەن ريزاشىلىعى زور.

«ءبىز نۇراددين ەكەۋمىزدىڭ وتاسقانىمىزعا 25 جىل بولدى، 3 بالا تاربيەلەپ وتىرمىز. ماعان دونور بولۋعا كەلىسكەنى ءۇشىن العىسىم شەكسىز. بارلىق جاعىنان ونىڭ اعزاسى ماعان سايكەس كەلدى»، - دەيدى قىزىلوردالىق كەلىنشەك.

بۇگىندە نۇربەك نۇراددين اۋرۋحانادان شىعارىلعان. جاقىن كۇندەردە ايەلى دە  قىزىلورداعا قايتۋدى جوسپارلاپ وتىر.

«وتا شامامەن بەس ساعاتقا سوزىلدى. ەكى كىسىنىڭ قان توبى مەن د ن ك-سى ءبىر بىرىنە تولىقتاي سايكەس كەلدى. سونىڭ ارقاسىندا بۇيرەكتى اۋىستىرۋ مۇمكىن بولدى. ادەتتە، ناۋقاستىڭ تۋىستارى دونور بولىپ جاتادى. بۇل ۇلكەن ساتتىلىك بولدى»، - دەيدى الماتى قالالىق كارديولوگيا جانە عىلىمي زەرتتەۋ ينستيتۋتىنىڭ ترانسپلانتولوگيا ءبولىمىنىڭ مەڭگەرۋشىسى اكىمجان زاينالوۆ.