ادامنان اۋمايتىن روبوت سوفيا استاناعا كەلەدى

 استانا. قازاقپارات - ەلوردادا وتەتىن جىبەك جولى ەلدەرى قالالارىنىڭ مەرلەر فورۋمىنا ادامنان اۋمايتىن سوفيا ەسىمدى روبوت شاقىرىلدى.

بۇل تۋرالى بۇگىن ديپلوماتيالىق كورپۋس وكىلدەرىنە ارنالعان بريفينگتە G- Global حالىقارالىق حاتشىلىعى جەتەكشىسىنىڭ ءبىرىنشى ورىنباسارى مۇرات قارىمساقوۆ ايتتى، دەپ حابارلايدى قازاقپارات ءتىلشىسى.

«بۇگىنگى كۇنى فورۋمعا قۇرمەتتى ساراپشى، سپيكەر رەتىندە قاتىسۋعا J. P. Morgan Chase Int. ديرەكتورلار كەڭەسىنىڭ ءتوراعاسى دجەيكوب فرەنكەل، بولگاريانىڭ بۇرىنعى پرەزيدەنتى پەتر ستويانوۆ، دەۆيد چەن جانە بەن گەرتسەل كەلىسىمىن بەردى. وزدەرىڭىزدە بىلەسىزدەر، الەمدەگى ەڭ جەتىلدىرىلگەن جاساندى گينويد سوفيانى ءدال وسى ماماندار جاساعان بولاتىن جانە ءبىز ولاردى كەلەدى دەپ كۇتىپ وتىرمىز. مەنىڭشە، گينويد سوفيانىڭ قاتىسۋىمەن فورۋمنىڭ ەڭ قىزىقتى شارالارىنىڭ ءبىرى بولادى» ، - دەدى ول.

ونىڭ ايتۋىنشا، مۇنان بولەك فورۋمعا تاتارستان پرەزيدەنتى رۋستام ميننيحانوۆ، Global Bank of Memories باس ديرەكتورى مارك گينزبۋرگ، «لابوراتوريا كاسپەرسكوگو» كومپانياسىنىڭ تەڭ قۇرىلتايشىسى ناتاليا كاسپەرسكويا، بۇرىنعى فەدەرالدىق كانتسلەر الفرەد گۋزەنباۋەر، پولشانىڭ بۇرىنعى پرەزيدەنتى الەكساندر كۆاسنيەۆسكي، رەسەيلىك تانىمال قوعام قايراتكەرى يرينا حاكامادا، نوبەل سىيلىعىنىڭ لاۋرەاتى راە كۆون چۋنگ قاتىساتىن بولادى.

«Global Silk Road» جىبەك جولى ەلدەرى قالالارىنىڭ مەرلەر فورۋمى 2-3 - شىلدە ارالىعىندا وتەدى.

«فورۋم باعدارلاماسى تولىققاندى 20 دان استام شارانى قامتيدى. بۇل فورۋمنىڭ ماڭىزدى شارالارىنىڭ ءبىرى ەلىمىزدىڭ باسشىلىعىنىڭ، بيزنەستىڭ، ساياسي ۇيىمدار مەن حالىقارالىق ينستيتۋتتاردىڭ، ساراپشىلىق قوعامداستىقتاردىڭ شەتەلدىك وكىلدىكتەرى قاتىساتىن جالپى وتىرىس بولماق» ، - دەدى مۇرات قارىمساقوۆ.

مۇنان بولەك، فورۋم اياسىندا سپورتتىق شارالار دا وتكىزىلەدى. ماسەلەن، جىبەك جولى ەلدەرى قالالارىنىڭ مەرلەر قۇراماسى مەن ەلىمىزدىڭ فۋتبول ارداگەرلەرى اراسىندا «جىبەك جولى كۋبوگى» ءۇشىن فۋتبولدان كەزدەسۋ جوسپارلانعان.

 

فوتو: hyser.com.ua