ەلوردالىقتار ورگانيكالىق جانە وڭدەلەتىن قوقىستى جەكە- جەكە كونتەينەرگە تاستايدى - يسەكەشيەۆ
بۇل تۋرالى «رۋحاني جاڭعىرۋ» باعدارلاماسىن جۇزەگە اسىرۋ تۋرالى و ك ق- دا وتكەن باسپا ءسوز ءماسليحاتىندا استانا قالاسىنىڭ اكىمى اسەت يسەكەشيەۆ ءمالىم ەتتى، دەپ حابارلايدى قازاقپارات ءتىلشىسى.
«وكىنىشكە قاراي، بىزدە قوقىستى دالاعا لاقتىراتىن جاۋاپسىز ادامدار بار. مەنىڭ ويىمشا، بۇل ءبىزدىڭ مادەنيەتتىڭ كورسەتكىشى سەكىلدى. ءبىز قوقىستى جيناۋ مەن وڭدەۋ بويىنشا ۇلكەن باعدارلامانى باستادىق. العاشقى ساتىدا ينۆەستورمەن كەلىسىپ وتىرمىز. ول بۇعان دەيىن توقتاپ تۇرعان زاۋىتتى ىسكە قوسىپ بەردى. ياعني، پلاتيستيكتى، اعاشتى قايتا وڭدەيتىن سەح اشىلدى. ينۆەستور 2 مىڭ كونتەينەر بويىنشا 30 قوقىس جيناۋشىنى ساتىپ الدى. قوقىس بويىنشا قازىر اسا ۇلكەن ماسەلەنى كورىپ وتىرعانىمىز جوق. قوقىستىڭ شىعارىلۋىن باقىلاۋعا الدىق»، - دەيدى ول.
اكىمنىڭ ايتۋىنشا، اتالعان باعدارلاما بويىنشا قازىر ەكىنشى كەزەڭ باستالعان.
«ونىڭ باستى ماقساتى رەسپۋبليكادا ءبىرىنشى بولىپ قوقىستى جەكە جيناۋ جۇيەسىنە كوشۋ بولىپ تابىلادى. بۇل ايتالىق - جاڭا مادەنيەت. ەۋروپادا ءاربىر ءۇي 4 قوقىس شەلەگى تۇراتىنىن بىلەسىزدەر. دەسە دە، قازىر ودان دا باس تارتىپ جاتىر. ال ءبىز قوقىستى ەكىگە ءبولۋ ارقىلى باسقا جولمەن كەتتىك: ياعني قوقىس ورگانيكالىق قوقىس جانە وڭدەۋگە بولاتىن - مەتالل، اعاش، قاعاز، پلاستيك، كيىم سەكىلدى قوقىستار دەپ ءبولىپ وتىرمىز. سوندىقتان، 6 مىڭ كونتەينەر ساتىپ الىنىپ، جۋىق ارادا ولاردىڭ بارلىعى اۋلالارعا ورناتىلادى. وسى بۇقارالىق ناۋقاندى مەكتەپتەردە باستادىق. تۇرعىندارعا وسىعان ماڭىز بەرۋدى سۇرار ەدىم. سەبەبى، جاقىندا قوقىستاردى ءبولۋ جۇيەسىنە كوشەمىز»، - دەيدى ول.
اسەت يسەكەشيەۆ قوقىستى فرانسۋزدىق تەحنولوگيامەن بولە وتىرىپ، قايتا وڭدەيتىن زاۋىت اشىلاتىنى اتاپ ءوتتى. سونىمەن قاتار، ول زاۋىتتىڭ قۇرىلىسى 2019 -جىلدىڭ كۇزىندە اياقتالاتىنىنا ۋادە بەردى.
«استانادا ەكولوگيا ماسەلەلەرى ويلاستىرىلماي، قوقىس ۇيىندىلەرى جيىلىپ قالادى. پوليتسيانى جۇمىلدىرساق تا، ءبارىن نازارعا الۋ مۇمكىن ەمەس. جىل سايىن قوقىستار شىعارىلىپ جاتىر. مەن ۇكىمەتكە قوقىس شىعارۋ سالاسىنداعى كومپانيالاردىڭ جۇمىسىنا باقىلاۋدى كۇشەيتۋ بويىنشا ۇسىنىس جولدادىم. «اتامەكەن» پالاتاسىمەن بىرگە قوقىس شىعارۋمەن اينالىساتىن كومپانيالاردى باقىلاۋ بويىنشا ءتيىمدى مەحانيزمدەردى قاراستىرۋدامىز»، - دەيدى اسەت يسەكەشيەۆ.
اۆتور: ايان بەكەن ۇلى
