ۇلكەن الماتى اينالما جولىنىڭ قۇرىلىسى باستالدى

جيىن باسىندا جوبانى جۇزەگە اسىرۋ بارىسى تۋرالى پرەزەنتاتسيامەن «السيم اركو» ا ق كونسەسسيونەر كومپانياسىنىڭ ۆيتسە- پرەزيدەنتى ابباس شاحين تانىستىردى. سالتاناتتى جيىندا ۇكىمەت باسشىسىنىڭ ءبىرىنشى ورىنباسارى اسقار مامين جوبانىڭ ماڭىزدىلىعىنا ايرىقشا توقتالىپ ءوتتى.

«ۇلكەن الماتى اينالما اۆتوكولىك جولىنىڭ قۇرىلىسى (ءۇا ا ا ج) - «نۇرلى جول» باعدارلاماسىنىڭ اياسىندا جۇزەگە اسىرىلىپ جاتقان ىرگەلى جوبا. ونى جۇزەگە اسىرۋ قازاقستان ەكونوميكاسى ءۇشىن ماڭىزدى وقيعا بولماق. بۇل مەملەكەتتىك- جەكەشەلىك ارىپتەستىك مەحانيزمىن قولدانۋ ارقىلى ينفراقۇرىلىمدى دامىتۋدىڭ العاشقى ءىرى جوباسى، ونى جۇزەگە اسىرۋعا ءىرى حالىقارالىق كومپانيالار قاتىسادى. جوبانىڭ قۇنى 180 ميلليارد تەڭگەگە جۋىق. 4 جىلدان كەيىن تولىق ىسكە قوسىلادى دەپ جوسپارلانعان. بۇگىن ءبىز ءۇ ا ا اج  قۇرىلىسىن باستاپ وتىرمىز. بارشاڭىزدى وسى قۋانىشتى جاڭالىقپەن قۇتتىقتايمىن» ، - دەدى ءبىرىنشى ۆيتسە- پرەمەر.

ءوز كەزەگىندە الماتى وبلىسىنىڭ اكىمى اماندىق باتالوۆ اينالما جول قۇرىلىسىنىڭ وبلىس ەكونوميكاسىن دامىتۋداعى ماڭىزىنا توقتالدى. بۇل ماڭىزدى اۆتوكولىك جولى وبلىستىڭ 3 اۋدانىنىڭ - قاراساي، ىلە، تالعار اۋداندارىنىڭ اۋماعىن باسىپ وتەدى.

«بۇگىن ءبىز ەلباسىنىڭ تىكەلەي تاپسىرماسىمەن اسا ءىرى جوبانى باستاپ وتىرمىز. بۇل جوبانىڭ الماتى وبلىسى ءۇشىن دە ماڭىزى زور. ەلباسى ساياساتىنىڭ ارقاسىندا جانە «نۇرلى جول» باعدارلاماسىنىڭ ناتيجەسىندە وبلىس اۋماعىندا «باتىس ەۋروپا - باتىس قىتاي» ، «الماتى - تالدىقورعان» سياقتى حالىقارالىق ستاندارتتاعى ءىرى اۆتوكولىك جولدارى سالىندى، ءۇ ا ا ا ج وسى كولىك دالىزدەرىنىڭ جالعاسى بولماق. اينالما اۆتوجولى اياقتالعاننان كەيىن بۇل ءوز كەزەگىندە وبلىستاعى شاعىن جانە ورتا بيزنەستىڭ، جول بويىنداعى قىزمەت كورسەتۋ مەن كولىك- قويما تەرمينالدارىنىڭ دامۋىنا اسەر ەتىپ، مۋلتيپليكاتيۆتى تيىمدىلىگىن كورسەتەتىن بولادى. سونىمەن قاتار ونەركاسىپ ورىندارى ءۇشىن نارىققا جول اشۋعا مۇمكىندىك جاسايدى» ، - دەدى ا. باتالوۆ.

سونداي- اق وبلىس باسشىسى اتاپ وتكەندەي، قۇرىلىس كەزىندە 3 مىڭنان استام جۇمىس ورنى قۇرىلىپ، ونىڭ %90 جەرگىلىكتى تۇرعىندار قۇرايتىن بولادى. ال قۇرىلىسى اياقتالعاننان كەيىن 2 مىڭعا جۋىق تۇراقتى جۇمىس ورنى اشىلادى. جالپى 300 ميلليارد تەڭگەگە جۋىق ينۆەستيتسيا تارتۋ كوزدەلگەن. جوبانى جۇزەگە اسىرۋ ءۇشىن وبلىس اكىمدىگى تاراپىنان بارلىق ءتيىستى شارالار قابىلدانعان، ياعني قاجەتتى جەر ۋچاسكەلەرى دەر كەزىندە بوساتىلدى، ۆاحتالىق قالاشىقتاردى، بەتون جانە اسفالت زاۋىتتارىن ورنالاستىرۋ مەن ولاردى بارلىق كوممۋنيكاتسيا جۇيەلەرىنە قوسۋ، قازۋ ورىندارىن بەلگىلەۋ ماسەلەلەرى شەشىلدى.

ءسوزىنىڭ قورىتىندىسىندا اماندىق باتالوۆ وبلىس اكىمدىگى قۇرىلىستىڭ ساپالى جانە مەرزىمىندە تالقىلاۋىنا بارىنشا قولداۋ كورسەتەتىنىن جەتكىزدى.