ەلورداداعى بوتانيكالىق ساياباق قالالىقتار دەمالاتىن سۇيىكتى ورىنعا اينالماق

استانا. قازاقپارات - اسەت يسەكەشەۆ ەلورداداعى بوتانيكالىق ساياباقتىڭ قۇرىلىسى بارىسىن تەكسەرىپ شىقتى.

جوسپار بويىنشا نىساننىڭ تاپسىرىلۋ مەرزىمى - 2018 -جىلدىڭ شىلدەسى، دەپ حابارلايدى اكىمدىكتىڭ رەسمي سايتى.

ساياباقتىڭ جالپى الاڭى مەن ساياباق ايماعى 87 گەكتار. قازىر ونىڭ اينالاسىنا كوپتەگەن تۇرعىن ۇيلەر سالىنىپ جاتىر. بولاشاقتا مۇندا عىلىمي-زەرتتەۋ، اعارتۋ جۇمىستارىمەن اينالىسۋعا بولادى. بوتانيكالىق باق تۋريستەردى دە تارتاتىن ورىنعا اينالماق.

«وسىنداي بىرەگەي بوتانيكالىق ساياباقتى جاساۋدىڭ يدەياسى مەملەكەت باسشىسىنا تيەسىلى. ەڭ باستىسى، بۇل جەر قالا تۇرعىندارى مەن قوناقتار ءۇشىن جايلى جانە سپورتتىق الاڭدارمەن دە جابدىقتالۋى ءتيىس. بۇل كەڭىستىك بارلىق تۇرعىندارعا قولايلى بولۋى كەرەك. وسىندا كەلۋشىلەردىڭ وزدەرىن وتە جايلى، قاۋىپسىز سەزىنۋى ماڭىزدى. مىندەتتى تۇردە بەينەكامەرالار، ستاسيونارلىق دارەتحانالار، سپورتتىق سەرۋەندەيتىن سۇرلەۋ جولدار ورناتىلۋى ءتيىس»، - دەدى قالا اكىمى.

بوتانيكالىق ساياباقتا 2 بالالار ويىن الاڭى، 20 ترەناجەر، 2 فۋتبول الاڭى، 4 تەننيس الاڭى، 4 ۆولەيبول جانە 2 باسكەتبول الاڭى، 14,2 ك م ۆەلوجول، 11.8 جۇگىرۋ جولى، دەمالىسقا ارنالعان 4 الاڭ، 8 ۇلكەن جارىق جانە 18 كىشى اەروديناميكالىق فونتان، ودان باسقا مۇندا WI- FI ءۇشىن ورىندىقتار ورناتىلادى. اعاشتاردىڭ جالپى سانى 95 مىڭدى قۇرايدى.

بۇگىنگە دەيىن ساياباقتا 2 -جىلىجاي، 45 مىڭ شارشى مەتر الاڭدى قۇرايتىن جاساندى سۋ قويماسى، جاياۋ جۇرگىنشىلەر كوپىرى، ۆەلوسيپەد جانە جۇگىرۋ جولدارى سالىندى.

سونىمەن قاتار شىلدەدە ابۋ-دابي پلازا كەشەنى مەن بوتانيكالىق ساياباقپەن شەكتەسەتىن اقمەشىت جانە تۇركىستان كوشەلەرى ارالىعىندا ورنالاسقان لينەينىي ساياباعىنىڭ ءبىرىنشى كەزەكتەگى قۇرىلىسى اياقتالادى. ساياباقتىڭ اۋماعىندا اعاش وتىرعىزۋ جۇمىستارى جۇرگىزىلۋدە. قازىرگى تاڭدا فونتان قۇرىلعىسى ورناتىلدى.

لينەينىي ساياباعىندا 2 قۇرعاق فونتاننىڭ قۇرىلىسى، ەكى بالالار الاڭى، 2.2 ك م ۆەلوسيپەد جولى مەن سكەيت الاڭىن سالۋ جوسپارلانۋدا.

اسەت يسەكەشەۆ بىرنەشە تۇرعىن ۇيلەردىڭ جانىندا ورنالاسقان لينەينىي ساياباعىنىڭ ورنالاسۋ ماڭىزدىلىعىن دا ايتا كەتتى. اكىمنىڭ ايتۋىنشا، ساياباق وتباسىلىق دەمالىسقا ارنالعان اتىشۋلى كەرەمەت ورىنعا اينالادى.

جالپى 2018 -جىلى استانا قالاسى بويىنشا 386 مىڭ اعاش وتىرعىزىلدى، ونىڭ 208 مىڭى ەلوردانىڭ «جاسىل بەلدەۋىنە»، تاعى 178 مىڭى ساياباقتار مەن گۇلزارلارعا ەگىلدى. وتكەن جىلى وتىرعىزىلعان اعاشتار سانى 312 مىڭدى قۇرادى.