بريتاندىققا تيگەن قازاق قىزى ءىرى مەيرامحانالاردىڭ تاپسىرىسىمەن نان پىسىرەدى
Chroniclelive.co.uk شولۋشىسى دجەين حولل سوڭعى 12 ايدا نيۋكاسلداعى ءىرى 20 ساۋدا نۇكتەسىن نانمەن قامتاماسىز ەتىپ كەلە جاتقان شىناردىڭ جەتىستىگى تۋرالى جازدى.
«مەن ادامداردىڭ نانعا دەگەن ماحابباتىن وياتۋعا تىرىسىپ جاتىرمىن»، - دەدى شىنار.
قاراعاندىدا تۋىپ-وسكەن شىنار كەزىندە Chevron كورپوراتسياسىندا اۋدارماشى بولىپ جۇمىس ىستەگەن. سول كەزدە ول بولاشاق كۇيەۋى بريتاندىق راسانى كەزدەستىرگەن. ونىڭ ءوز ماماندىعى - ساۋلەتشى. قازىر ولار اليكا جانە لۋكا اتتى ەكى بالاسىمەن نيۋكاسلدا تۇرىپ جاتىر.
ول بالالارىنىڭ ارقاسىندا ءوز ناۋبايحاناسىن اشۋ تۋرالى ويدى جۇزەگە اسىرعان. ول بارلىق كليەنتتەرىن نانمەن قامتاماسىز ەتۋ ءۇشىن تۇنگى ەكىدە ويانىپ، جۇمىس ىستەيدى.
ول ءوزىنىڭ سۇيىكتى ىسىمەن اينالىسۋ ءۇشىن كەڭسەدەگى جۇمىسىنان قول ۇزگەن. «ءيا، قازىر مەن ۇنەمى ۇن مەن قامىردىڭ ورتاسىندامىن! ماعان باسقا ەشتەڭە كەرەك ەمەس»، - دەيدى ول.
ۇلى بريتانياعا العاش رەت 2005 -جىلى كەلگەن شىنار ەلدەگى ناننىڭ ساپاسىنا تاڭعالعان. ونىڭ ايتۋىنشا، مۇندا ناندار ونەركاسىپتىك اۋقىمدا جاسالعان جانە ءتۇرلى قوسپالاردان قۇرالعان. قازاقستاندا ءبارى باسقاشا.
«ۇلى بريتانيادا ادامداردىڭ ءبىزدىڭ ەلدەگىدەي دايىندامايتىندارىن تۇسىنبەيتىنمىن. جارتىلاي دايىن ءونىمدى قىسقا تولقىندى پەشكە سالىپ، جىلىتىپ، سودان تاماق جاسايتىندارىن تۇسىنە المايمىن. قازىرگە دەيىن تۇسىنبەيمىن»، - دەپ ءبولىستى شىنار.
«قازاقستاندا نان - وتە ماڭىزدى. ول قوناقجايلىلىقتىڭ بەلگىسى»، - دەپ اتاپ ءوتتى ول.
شىنار ءوز ءىسىن بىردەن اشپاعان. العاشقىدا ول شوتلانديا مەن ۇلى بريتانيادا نان ءپىسىرۋ ءىسى كۋرسىن ءتامامداعان. كەيىن وسى سالاداعى بىرنەشە كومپانيادا جۇمىس ىستەگەن.
«مەن ءار تۇتىنۋشىعا كوڭىل بولەمىن. كليەنتتەرمەن ۇستەل باسىنا وتىرىپ، بارلىعىن كۇلە وتىرىپ تالقىلاعاننىڭ ءوزىن ۇناتامىن»، - دەدى ول.
