ءۇي الۋعا مۇمكىندىك بار

 استانا. قازاقپارات - «نۇر وتان» پارتياسى پەتروپاۆل قالالىق فيليالى ۇيىمداستىرعان تىڭداۋدا سولتۇستىك قازاقستان وبلىستىق ءماسليحاتىنىڭ دەپۋتاتتارى «نۇرلى جەر» مەملەكەتتىك باعدارلاماسىن ىسكە اسىرۋ ماسەلەلەرىن تالقىلادى.

قالالىق قۇرىلىس ءبولىمىنىڭ باسشىسى سەرىك ءسابىراليننىڭ اقپاراتى بويىنشا بيىلعى 1- توقساندا جالپى الاڭى 97,4 مىڭ شارشى مەتر بولاتىن 1288 پاتەرلىك 11 ءۇيدىڭ قۇرىلىسى باستالدى. جىلدىڭ سوڭىنا دەيىن تاعى دا 66 مىڭ شارشى مەتر باسپانانى پايدالانۋعا ەنگىزۋ جوسپارلانىپ وتىر. بارلىق ءۇي «نۇرلى جەر» باعدارلاماسى اياسىندا سالىنادى.

- سالىنىپ جاتقان تۇرعىن ءۇيدىڭ 9 ى «قازاقستاننىڭ تۇرعىنۇيقۇرىلىس جيناق بانكى» ا ق جۇيەسى ارقىلى ىسكە اسىرىلادى. بۇل شامامەن - 85 مىڭ شارشى مەتر. «بەرەكە» ىقشاماۋدانىندا ءبىر 96 پاتەرلىك ءۇيدى پايدالانۋعا بەرۋ كوزدەلگەن. قوسىمشا الاڭى 4,6 مىڭ شارشى مەتر 60 پاتەرلى جالدامالى- كوممۋنالدىق ءۇي 19-شاعىن اۋداندا بوي كوتەرىپ كەلەدى. بارلىق نىسانداردى سالۋعا 8,4 ميلليارد تەڭگە بولىنگەن، - دەپ اتاپ ءوتتى سەرىك سابىرالين.

پەتروپاۆلدا جاڭا جىلۋ ماگيسترالىنىڭ قۇرىلىسى دا جۇرگىزىلۋدە. ول «بەرەكە» ىقشاماۋدانىن، ۆوكزال ماڭىن جانە جۇمىسشىلار كەنتىن قامتيدى. «بەرەكە - 2» ىقشاماۋدانىندا ينجەنەرلىك- كوممۋنيكاتسيالىق ينفراقۇرىلىمدى ۇيلەستىرۋ باستالدى. بۇعان جىلۋمەن، سۋمەن جابدىقتاۋ، سۋ بۇرۋ، بايلانىس جەلىلەرىنىڭ قۇرىلىسى، ارىقتار تارتۋ مەن ەلەكترمەن جابدىقتاۋ قۇرىلىسى كىرەدى. ەلەكتر ەنەرگياسىمەن ۇزدىكسىز قامتاماسىز ەتۋ ءۇشىن «جاس وركەن» ىقشاماۋدانىندا جاڭا قوسالقى ەلەكتر ستانساسىنىڭ قۇرىلىسى باستالدى.

 

جامبىل قىرعىزباي

«ايقىن»