قىتاي ازاماتى سۇيىكتىسىنە اقشادان جاسالعان گۇل شوعىن سىيلايمىن دەپ، زاڭدى بۇزدى

 استانا. قازاقپارات - قىتايدا ەر ادام سۇيىكتىسىنە بانكنوتتاردان جاسالعان ۇلكەن گۇل شوعىن سىيلادى. سۇيىكتىسىن وسىلاي تاڭعالدىرعىسى كەلگەن ازاماتتى ەندى زاڭعا بايلانىستى قيىندىقتار كۇتىپ تۇر.

 بۇل تۋرالى Asia One پورتالى حابارلادى، دەپ جازادى Stan.kz اقپاراتتىق اگەنتتىگى. قىتايداعى چۋڭشيڭ قالاسىنىڭ تۇرعىنى سۇيىكتىسىنىڭ تۋعان كۇنىنە جالپى قۇنى 334 مىڭ يۋان بولاتىن اقشادان جاسالعان گۇل شوعىن سىيلاعان. مەرەكەلىك كەشتە بولعان قوناقتاردىڭ ءبىرى بانكنوتتان جاسالعان گۇلدى جەتى فلوريست ون ساعات بويى جاساعان دەيدى.

«ول دوس قىزىن قاتتى جاقسى كورەدى جانە ونىڭ وتباسىندا اقشا كوپ» ، - دەدى ول.

دەگەنمەن، قىتاي حالىق بانكىنىڭ قىزمەتكەرى وتانداستارىنىڭ رومانتيكالىق ارەكەتىن ۇناتپادى. سونداي- اق، ول عاشىق جىگىتتىڭ ۇلتتىق ۆاليۋتاعا قاساقانا زيان كەلتىرگەنى ءۇشىن جاۋاپقا تارتىلىپ، سوتتاۋى مۇمكىن ەكەندىگىن ايتتى.

«بۇعان تىيىم سالىنعان، سەبەبى ادامدار ۆاليۋتانى (يۋاندى) باعالاۋلارى كەرەك. ماحابباتىن ءبىلدىرۋدىڭ كوپتەگەن جولدارى بار، ءبىراق ەشكىم زاڭدى بۇزباۋى ءتيىس» ، - دەپ ءتۇسىندىردى ول.

سونىمەن قاتار، گۇل شوعىن دايىنداۋ كەزىندە بانكنوتالارعا زاقىم كەلگەنى، كەلمەگەنى ازىرشە بەلگىسىز.