ءماجىلىس «قورعاس» ورتالىعىنىڭ قاۋىپسىزدىگىنە ارنالعان زاڭ جوباسىن ماقۇلدادى

استانا. قازاقپارات - «قورعاس» وزەنىندەگى «شۇكىربۇلاق» بوگەتىنىڭ قۇرىلىسىن قازاقستان مەن قىتاي بىرلەسىپ قارجىلاندىرادى.

 بۇل تۋرالى پارلامەنت ءماجىلىسىنىڭ جالپى وتىرىسىندا بوگەت قۇرىلىسىنا ارنالعان زاڭ جوباسىن تانىستىرۋ كەزىندە ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى، دەپ حابارلايدى قازاقپارات ءتىلشىسى.

«وتكەن جىلدىڭ ماۋسىم ايىندا ءبىزدىڭ ۇكىمەت پەن قىتاي ۇكىمەتى اراسىندا «قورعاس» وزەنىندە «شۇكىربۇلاق» بوگەتىن بىرلەسىپ سالۋعا ارنالعان كەلىسىمگە قول قويىلدى. اتالعان بوگەت «قورعاس» حالىقارالىق ورتالىعىنىڭ قاۋىپسىزدىگىن قامتاماسىز ەتۋ ءۇشىن قاجەت. سەبەبى ورتالىق وتە جوعارى سەل مەن تاسقىن قاۋپى بار اۋماقتا ورنالاسقان»، - دەدى ق. قاسىموۆ.

ونىڭ سوزىنە قاراعاندا، قۇرىلىسقا ەكى جاق تەڭ قارجى بولەتىن بولادى. قۇرىلىستىڭ جالپى سمەتالىق قۇنى 11,7 ميلليارد تەڭگە.

«بۇعان كەرەكتى قاراجات 2018-2020 - جىلدارعا ارنالعان رەسپۋبليكالىق بيۋدجەتتە قارالعان»، - دەپ ناقتىلادى مينيستر.

تالقىلاۋدان كەيىن پالاتا دەپۋتاتتارى «ق ر ۇكىمەتى مەن ق ح ر ۇكىمەتى اراسىنداعى قورعاس وزەنىندە «شۇكىربۇلاق (المالى)» بىرلەسكەن سەل ۇستايتىن بوگەتىن سالۋداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسىن ماقۇلدادى.

اۆتور: رۋسلان عابباسوۆ