ەلەۋسىنوۆ ۇلى بريتانياداعى ايقاسى الدىندا اشىق جاتتىعۋ وتكىزەدى

استانا. قازاقپارات - دانيار ەلەۋسىنوۆتىڭ (1-0، 1 ك و) مۇددەسىن قورعايتىن Matchroom Boxing پروموۋتەرلىك كومپانياسى جانكۇيەرلەردى قازاقستاندىق بوكسشىنىڭ جانە لوندوندا وتەتىن بوكس كەشىنە قاتىسۋشى وزگە دە سپورتشىلاردىڭ اشىق جاتتىعۋىن تاماشالاۋعا شاقىردى، دەپ حابارلايدى قازاقپارات Sports.kz سايتىنا سىلتەمە جاساپ.

اشىق جاتتىعۋ 1 -ماۋسىم كۇنى BXR London زالىندا وتەدى. باستالۋى استانا ۋاقىتىمەن 19.00-دە. بوكس كەشىنىڭ ءوزى 6 -ماۋسىمعا جوسپارلانعان. ونىڭ حەدلاينەرلەرى - بريتاندىق لوۋرەنس وكولي (8-0، 6 ك و) مەن ليۋك ۋوتكينس (13-0، 9 ك و).

جارتىلاي ورتا سالماقتا ونەر كورسەتەتىن دانيار ەلەۋسىنوۆ ونىڭ اندەركاردىندا ايقاسادى. جەكپە-جەك التى راۋندقا ەسەپتەلگەن. ونىڭ قارسىلاسى ازىرگە بەلگىسىز.

ەسكە سالايىق، ەلەۋسىنوۆ كاسىپقوي بوكستاعى العاشقى جەكپە-جەگىن اعىمداعى جىلدىڭ 28 -ءساۋىرى كۇنى نيۋ-يوركتە وتكىزدى. ءۇشىنشى راۋندتا امەريكالىق نوا كيدتى (3-1-1، 2 ك و) تەحنيكالىق نوكاۋتپەن جەڭگەن بولاتىن.