ديماش قۇدايبەرگەن تۋعان جەرىنە كەلدى

اقتوبە. قازاقپارات - ءانشى ديماش قۇدايبەرگەن تۋعان جەرى اقتوبە قالاسىنا كەلدى، دەپ حابارلايدى قازاقپارات ءتىلشىسى.

اقتوبەدە «باقىتتى بالا» اشىق بالالار ۆوكالدىق فەستيۆال- بايقاۋى وتەدى. 1-2 -ماۋسىم كۇندەرى ونەر ورتالىعىندا وتەتىن بايقاۋعا ديماش قۇدايبەرگەن دە قاتىسىپ، قاتىسۋشىلاردىڭ ونەرىن تاماشالايدى. بۇعان دەيىن حابارلاعانىمىزداي، گالا كونسەرت، ماراپاتتاۋ كەزىندە ديماش قۇدايبەرگەن، دانيەل تولەشوۆا ءان شىرقايدى. اقىلداستار القاسىنا كىرگەن ءانشى ديماش قۇدايبەرگەن فەستيۆال سوڭىندا ءوزىنىڭ اتاۋلى جۇلدەسىن تابىس ەتپەك.

«بايقاۋدا ءادىلقازىلار القاسى مەن اقىلداستار القاسى بار. ديماش اقىلداستار القاسىنا كىرىپ وتىر. ول كونكۋرسقا قاتىسۋشىلاردى تىڭداپ، ءوز پىكىرىن ايتا الادى. ءبىراق ءادىلقازىلاردىڭ شەشىمىنە ارالاسپايدى. ال گالا كونسەرت كەزىندە ديماش قۇدايبەرگەن بىرنەشە ءان ايتادى»، - دەدى «ديماش الي» شىعارماشىلىق ورتالىعىنىڭ جەتەكشىسى قانات ايتبايەۆ.

ايتا كەتەيىك، ديماش قۇدايبەرگەننىڭ «باستاۋ» اتتى كونسەرتىندە شوۋ دايىنداعان رەجيسسەر اننا وبويانسكايا «باقىتتى بالا» بايقاۋىنىڭ گالا كونسەرتىن ءوز قولىنا الدى.