ءومىرزاق شوكەيەۆ فەرمەلەرگە تەحنيكانى ءتيىمدى جولمەن بەرۋ جولدارىن اتادى

استانا. قازاقپارات - بۇگىن ماجىلىستەگى ۇكىمەت ساعاتىندا ق ر پرەمەر- ءمينيسترىنىڭ ورىنباسارى- اۋىل شارۋاشىلىعى ءمينيسترى ءومىرزاق شوكەيەۆ فەرمەرلەردى تەحنيكامەن قامتاماسىز ەتۋدىڭ جاڭا تەتىكتەرىن ايتتى، دەپ حابارلايدى قازاقپارات ءتىلشىسى.

  اتاپ ايتقاندا، ءو. شوكەيەۆ 2017-2021 -جىلدارعا ارنالعان  ا ءو ك- ءنى دامىتۋ باعدارلاماسىنا تۇزەتۋلەر ەنگىزۋ تاقىرىبىندا بايانداما جاسادى. بۇل ورايدا بىرنەشە سالالىق باعدارلامالاردى قامتۋ كوزدەلىپ وتىر.

«كەلەسى مىندەت - سالانى تەحنيكالىق جاعىنان كۇشەيتۋ. بۇل رەتتە ليزينگ بويىنشا پايىزدىق ستاۆكانى سۋبسيديالاۋ جانە ينۆەستيتسيالىق سۋبسيديالاۋ ارقىلى ىسكە اسادى. قازىر شارۋالار ليزينگتى 16-18 پايىزبەن الاتىن بولسا، بۇل 7-8 پايىزعا دەيىن تومەندەتىلەدى. سوندىقتان وسىنداي قولداۋدى بىرتىندەپ كوبەيتىپ، 2022 -جىلعا قاراي كاسىپكەرلەردىڭ تەحنيكاعا سالاتىن ينۆەستيتسياسىن 273  ميلليارد تەڭگەگە دەيىن جەتكىزۋدى كوزدەپ وتىرمىز. وسى شارالاردىڭ ارقاسىندا اۋىل شارۋاشىلىعى تەحنيكاسىنىڭ پاركى 5 جىلدا لايىقتى دەڭگەيگە جەتەدى. بۇل كەيىن تەحنيكانىڭ جىل سايىن 6 پايىزىن جاڭارتىپ وتىرۋعا مۇمكىندىك تۋعىزادى. بيىلدان باستاپ ينۆەستيتسيالىق سۋبسيديالاۋ 25 پايىزدى قۇرايدى»، - دەدى مينيستر.

بۇدان بولەك شوكەيەۆ سالاعا ناقتى ەگىنشىلىك ەلەمەنتتەرى (ەگىستىكتەردىڭ ەلەكتروندى كارتالارى، ناقتى مەتەودەرەكتەر، سەنسورلار مەن داتچيكتەر، عارىش مونيتورينگى) ەنگىزىلەتىندىگىن جەتكىزدى. سونداي- اق عىلىمي- زەرتتەۋ ينستيتۋتتارى مەن تاجىريبەلىك شارۋاشىلىقتار بازاسىندا وسى تەحنولوگيالاردى كوبەيتۋ جانە وقىتۋ ۇيىمداستىرىلاتىن بولادى.

 بۇدان بۇرىن حابارلانعانداي، ءومىرزاق شوكەيەۆ فەرمەلەردىڭ تۇقىم الۋعا جۇمساعان شىعىستارى وتەلەتىنىن ءمالىم ەتتى.

اۆتور: رۋسلان عابباسوۆ