تەڭگە ءىلۋ مەن اۋدارىسپاقتان ازيا چەمپيوناتىنا يۋنەسكو وكىلدەرى كەلە جاتىر
ات قۇلاعىندا وينايتىن ەپتىلىگى ەرەك، مىعىم سپورتشىلار سايىسىنا تىگىلىپ وتىرعان جۇلدە دە قوماقتى. بيىلعى ايتۋلى چەمپيوناتتاردىڭ قانداي ەرەكشەلىگى بار؟ وسى جانە وزگە دە سۇراقتار بويىنشا قازاقپارات ءتىلشىسى ۇلتتىق جانە ات سپورتى تۇرلەرى ورتالىعىنىڭ ديرەكتورى نۇرسۇلتان يبراگيموۆكە حابارلاسقان ەدى.
«بىرىنشىدەن، استانانىڭ 20 جىلدىق مەرەيتويى اياسىنداعى قوس قۇرلىق چەمپيوناتىن ۇيىمداستىرۋعا قولداۋ كورسەتكەن ق ر مادەنيەت جانە سپورت ءمينيسترى ارىستانبەك مۇحامەدي ۇلىنا مىڭداعان جانكۇيەرلەردىڭ اتىنان العىس ايتقىمىز كەلەدى. ۇلتتىق مۇرامىزدىڭ ءورىسىن كەڭەيتىپ، ناسيحاتىن كۇشەيتۋگە سەپتىگى تيەتىن مۇنداي ءىرى حالىقارالىق جارىستاردى ءوز دەڭگەيىندە اتقارۋعا تۇتاس مينيسترلىكتىڭ اتسالىسۋى كوڭىلىمىزگە قۋانىش ۇيالاتادى. وسى جىلى تەڭگە ىلۋدەن جانە اۋدارىسپاقتان ازيا چەمپيوناتتارى 1-2 -ماۋسىم كۇندەرى وتەدى. ايتا كەتەرلىگى، 2015 -جىلى استانادا تەڭگە ىلۋدەن I ازيا چەمپيوناتى ءوتىپ، وعان ازيانىڭ 8 مەملەكەتى قاتىسقان بولاتىن»، - دەيدى ول.
نۇرسۇلتان يبراگيموۆتىڭ ايتۋىنشا، 2014 -جىلدىڭ ماۋسىمىندا استانادا وتكەن اۋدارىسپاقتان I ازيا چەمپيوناتىنا 11، ال 2016 -جىلى ق ح ر ىلە قازاق اۆتونوميالى وبلىسىندا وتكەن اۋدارىسپاقتان II ازيا چەمپيوناتىنا 10 مەملەكەت قاتىسقان.
«وسى جىلى اتالعان چەمپيوناتتارعا 9 ەلدەن، اتاپ ايتقاندا، قازاقستان، وزبەكستان، قىرعىزستان، تاجىكستان، موڭعوليا، رەسەي، اۋعانستان، قىتاي، تۇركيادان 54 سپورتشى، ال جالپى جارىسقا قاتىساتىن دەلەگاتسيا مۇشەلەرىن قوسقاندا 100-گە تارتا ادام قاتىسۋى جوسپارلانعان. جەكەلەي الساق، تەڭگە ىلۋدەن ازيا چەمپيوناتىنا 9 ەلدەن 10 سپورتشى قاتىسادى. ال اۋدارىسپاقتان 9 مەملەكەتتەن 44 سپورتشى كەلىپ وتىر. نەگىزى، ەلىمىزدە وتەتىن ات جارىستارىنا شەتەلدىكتەردىڭ قىزىعۋشىلىعى جوعارى، سەبەبى قازاقستان كەز- كەلگەن جارىستى جوعارى دەڭگەيدە وتكىزەتىنىن ايتا كەتكەن ءجون. جارىستاردىڭ جۇلدە قورى دا قوماقتى. چەمپيوناتتاردىڭ جالپى جۇلدە قورى - 14 ميلليون تەڭگە»، - دەيدى نۇرسۇلتان يبراگيموۆ.
ۇلتتىق جانە ات سپورتى تۇرلەرى ورتالىعىنىڭ ديرەكتورى سونداي-اق سپورتشىلارعا قويىلاتىن تالاپتار تۋرالى ايتا كەتتى.
«تەڭگە ىلۋدەن II ازيا چەمپيوناتىن وتكىزۋ رەگلامەنتىنە سايكەس، جارىسقا جاسى 18 گە تولعان، قاجەتتى دايىندىقتان وتكەن، جەكە باسىن كۋالاندىراتىن قۇجاتى بار سپورتشى، ياعني شەت مەملەكەتتەن - 1، ال وتكىزۋشى مەملەكەت تاراپىنان - 2 سپورتشى قاتىسادى. اۋدارىسپاقتا دا سولاي. 18 دەن اسقان، قاجەتتى دايىندىقتان وتكەن، جەكە باسىن كۋالاندىراتىن قۇجاتى بار سپورتشى باعىن سىناي الادى. جارىس 5 سالماق جانە ابسوليۋتتىك سالماق دارەجەسى بويىنشا (60، 70، 80، 90 كەلى جانە 90 كەلىدەن جوعارى) وتكىزىلەدى»، - دەيدى ول.
نۇرسۇلتان يبراگيموۆتان سونداي-اق اتالعان ازيا چەمپيوناتتارىن كورۋگە يۋنەسكو وكىلدەرى كەلەدى دەگەن اقپارات تۋرالى سۇراستىرىپ كوردىك.
«بۇل شىندىق. 31 -ماۋسىمدا ەلورداعا يۋنەسكو-نىڭ ءداستۇرلى سپورتتار مەن ويىندار كوميتەتى وكىلدەرى كەلەدى دەپ جوسپارلانعان. وسى ايتۋلى ازيا چەمپيوناتتارىنا يۋنەسكو-نىڭ ناقتى نازار اۋدارۋى ۇلتتىق سپورت تۇرلەرىنىڭ كەلەشەكتە الەمدىك دەڭگەيدە ناسيحاتتالا باستالۋىنان ۇمىتتەندىرەدى. ءار مەملەكەتتىڭ داستۇرلەرى مەن سالتتارىنىڭ ساقتالۋىنا اسا جاۋاپتى قارايتىن ۇيىم وكىلدەرىنىڭ ەلىمىزگە كەلۋىنىڭ باستى ماقساتى - قۇرلىق چەمپيوناتتارىن تاماشالاۋمەن قاتار، قازاقستانداعى ۇلتتىق سپورت باسەكەلەرىنىڭ ۇيىمداستىرىلۋى مەن ناسيحاتىن، جالپى دامۋ بارىسىن كورىپ، ءبىلىپ قايتۋ»، - دەيدى ول.
نۇرسۇلتان يبراگيموۆ ۇلتتىق سپورت تۇرلەرىنەن وتەتىن سايىستار مۇنىمەن شەكتەلىپ قالمايتىنىن تىلگە تيەك ەتتى.
«الدىمىزدا ۇلكەن مىندەت تۇر. استانا قالاسىنىڭ 20 جىلدىعىنا ارنالعان «ۇلى دالا رۋحى» فەستيۆالى. بۇل بايراقتى باسەكە 8 سپورت ءتۇرى بويىنشا ۇيىمداستىرىلاتىن بولادى. ەلىمىزدىڭ 4 ايماعىندا وڭتۇستىك، سولتۇستىك، شىعىس، باتىس وبلىستارىندا ىرىكتەۋ كەزەڭدەرى وتەدى. فينال ەلوردا تورىندە سالتانات قۇرماق. استانا قالاسىنىڭ 20 جىلدىعىن ەلىمىزدىڭ ايماقتارى دا ەرەكشە سەزىنۋ ءۇشىن ىرىكتەۋ باسەكەلەرى ارنايى وبلىستاردا ۇيىمداستىرىلۋدا»، - دەپ ءتۇيدى نۇرسۇلتان يبراگيموۆ.
