بيىل قانشا بالا لاگەردە دەمالادى
بۇل تۋرالى ۇكىمەت وتىرىسىندا ق ر ءبىلىم جانە عىلىم ءمينيسترى ەرلان ساعاديەۆ ايتتى، دەپ حابارلايدى قازاقپارات ءتىلشىسى.
«جازعى دەمالىس كەزىندە بالالاردىڭ دەمالىسىن، بوس ۋاقىتىن جانە جۇمىسپەن قامتاماسىز ەتىلۋىن ۇيىمداستىرۋ بويىنشا جۇمىستاردى جالعاستىرىپ وتىرمىز. بيىل جازدا 2 ميلليون 815 مىڭ 1-10 -سىنىپ وقۋشىلارىنىڭ 2,6 ميلليونى نەمەسە 92 پايىزى لاگەرلەردە دەمالادى دەپ كۇتىلۋدە. بۇل بىلتىرعى جىلمەن سالىستىرعاندا 120 مىڭ بالاعا كوپ»، - دەدى مينيستر.
سونداي-اق ونىڭ دەرەگىنشە، ءبىرىنشى ماۋسىمننان باستاپ 1,5 ميلليون بالاعا مەكتەپتەر جانىنداعى 12,5 مىڭ لاگەر جۇمىسىن باستايدى. جازدا قالا سىرتىنداعى 125 جانە 2 مىڭعا جۋىق شاتىرلى سپورتتىق، كيىز ۇيلىك لاگەرلەر جۇمىس ىستەيدى. سونىمەن قاتار جازعى كەزدە بارلىق ءبىلىم بەرۋ ۇيىمدارىندا، اۋلا كلۋبتارىندا سەكسيالار جۇمىس ىستەپ، ساياحاتتار ۇيىمداستىرىلادى. وعان 2,5 ميلليوننان استام نەمەسە 91 پايىز وقۋشى بارادى دەپ جوسپارلانعان.
«وسى جازدىڭ ەڭ ۇلكەن شاراسى 1 -ماۋسىمدا وتكىزىلەتىن بارلىق مەكتەپتەردىڭ ۇلتتىق مۋزىكالىق انسامبلدەرىنىڭ شەرۋى بولماق. بيىل حالىقارالىق بالالاردى قورعاۋ كۇنىندە وتكىزىلەتىن پارادقا وڭىرلەردە 500 مىڭنان استام بالانىڭ قاتىسۋى كوزدەلىپ وتىر. بىلتىرعى جىلى 100 مىڭ بالا قاتىسسا، بيىل بەس ەسە وسكەنىن كورىپ وتىرمىز، - دەدى ەرلان ساعاديەۆ.
