ورتالىق ازيادا تاجىكستان بالا سانىن كوبەيتپەۋ تۋرالى ناسيحاتتايتىن بىردەن ءبىر ەل

بۇرىنعى سوۆەتتىك رەسپۋبليكالار اراسىندا تاجىكستان تۋۋ كورسەتكىشى بويىنشا الدا كەلەدى. رەسمي اقپاراتقا سايكەس، ەل تۇرعىندارىنىڭ سانى جىل سايىن 2,2 پايىزعا، نەمەسە 200 مىڭ ادامعا كوبەيىپ وتىر.
سونىمەن بىرگە ورتالىق ازيادا تاجىكستان بالا تۋۋدى باقىلاۋدا ۇستاۋ جانە وتباسىلارىنا بالا سانىن كوبەيتپەۋ تۋرالى رەسمي تۇردە ناسيحاتتايتىن بىردەن ءبىر ەل. تاجىكستان تۇرعىندارى ەڭ جاس مەملەكەت سانالادى. ەلدەگى ءبىر جاستان 14 جاسقا دەيىنگى بالا سانى ءۇش ميلليونعا جۋىق. ساراپشىلار ولار جاقىن ونجىلدىقتا جۇمىسشى كۇشى قاتارىن تولىقتىراتىنىن ايتادى. قازىرگى كەزدە تاجىكستاننىڭ ءبىر ميلليوننان استام ازاماتى رەسەي، قازاقستان جانە وزگە ەلدەردە جۇمىس ىستەپ ءجۇر.
سوڭعى رەت 2010 -جىلى جۇرگىزىلگەن حالىق ساناعى دەرەكتەرى بويىنشا، تاجىكستاندا جەتى ميلليون 417 مىڭ تۇرعىن بولعان. كەزەكتى ساناق 2020 -جىلى ءوتۋى ءتيىس.
ب ۇ ۇ بولجامى بويىنشا، 2050 -جىلعا قاراي تاجىكستان تۇرعىندارىنىڭ سانى 14,5 ميلليون ادامعا جەتۋى مۇمكىن. ب ۇ ۇ ساراپشىلارى جاقىن ونجىلدىقتا ورتالىق ازيا ەلدەرىنىڭ بارىندە حالىق سانى وسەدى دەپ سانايدى.
مىسالى، ب ۇ ۇ بولجامىنا سايكەس، 2050 -جىلعا قاراي قازاقستان تۇرعىندارىنىڭ سانى 22,9 ميلليون ادامعا جەتپەك (ب ۇ ۇ دەرەگى بويىنشا قازىر 17,5 ميلليون تۇرعىن بار). قىرعىزستاندا بۇل كورسەتكىش - 8,1 ميلليون (قازىر - 5,8 ميلليون)، تۇركىمەنستاندا - 7,8 ميلليون (5,5 ميلليون)، وزبەكستاندا - 40,9 ميلليون (30,9 ميلليون) بولماق.
www.azattyq.org