الماتى وبلىسىندا كونە قالالاردىڭ ارحەولوگيالىق قازبا جۇمىستارى جالعاسۋدا
وعان قوسا تاياۋ ارادا سارقان اۋدانىنداعى «قويلىق»، ەسكەلدى اۋدانىنداعى «ەشكىولمەس» پەتروگليفتەرىنە، جامبىل اۋدانىنداعى «بۇرعان ساق» پەن «تاڭبالىتاس» قورعاندارىنا ارحەولوگيالىق زەرتتەۋ باستالادى. بۇل تۋرالى وبلىس اكىمى اماندىق باتالوۆ ورتالىق كوممۋنيكاتسيالار قىزمەتىندە وتكىزگەن بريفينگ بارىسىندا ءمالىم ەتتى.
«الماتى وبلىستىق قازاقستان حالقى اسسامبلەياسى مەن ءىلياس جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ جانە وڭىردەگى ولكەتانۋشى، گەوگراف، تاريحشى عالىمداردىڭ بىرلەسكەن «رۋحى بەكەم، كيەلى مەكەن - جەتىسۋ» عىلىمي- تانىمدىق ەكسپەديتسياسىنا 5 مىڭنان استام ادام تارتىلدى. وبلىستاعى كيەلى ورىندار تۋرالى ەل ىشىنەن جيناقتالعان اڭىزدار مەن اڭگىمەلەر، فوتوماتەريالدار ەكى تومدىقتى قۇراپ، جۇمىستىڭ ناتيجەسىن كورسەتتى. ءبىرىنشى تومى وقىرماندارعا جول تارتسا، ەكىنشى تومى ەرتەڭ باستالعالى وتىرعان ەكسپەديتسيانىڭ قورىتىندىسىندا شىعارىلاتىن بولادى»، - دەدى اماندىق باتالوۆ.
سونىمەن قاتار بيىلعى جىلدىڭ ىرگەلى شاراسى رەتىندە شوقان ءۋاليحانوۆتىڭ قاشقارياعا بارعان جولىمەن جۇرەتىن عىلىمي- تانىمدىق «شوقان ىزىمەن» ەكسپەديتسياسىن جانە ق ح ر- عا «مۇقالي» مەديا- ەكسپەديتسياسىن اتاۋعا بولادى.
اۆتور: سامال قابىشيەۆا