الەم مۋزەيلەرىن شارلاعان «التىن ادام» باكۋگە كەلدى

باكۋ. قازاقپارات - ازەربايجان استاناسى باكۋ قالاسىندا «ۇلى دالا مۇراسى: زەرگەرلىك ونەر جاۋھارلارى» كورمەسى اشىلدى.

بۇل تۋرالى قازاقپارات ق ر ۇلتتىق مۋزەيىنىڭ باسپا ءسوز قىزمەتىنە سىلتەمە جاساپ حابارلايدى.

ازەربايجان تاريحى ۇلتتىق مۋزەيى قازاقستان رەسپۋبليكاسى ۇلتتىق مۋزەيىمەن بىرلەسىپ، حالىقارالىق «التىن ادامنىڭ الەم مۋزەيلەرىنە شەرۋى» اتتى جوبا اياسىندا «ۇلى دالا مۇراسى: زەرگەرلىك ونەر جاۋھارلارى» كورمەسى اشىلدى.

كورمەنىڭ اشىلۋ سالتاناتىنا ازەربايجان رەسپۋبليكاسىنداعى توتەنشە جانە وكىلەتتى ەلشىسى بەيبىت يسابايەۆ قاتىسىپ ءسوز سويلەدى.

«بۇگىنگى كورمەنىڭ باستى جادىگەرى «قازاقستاندىق تۋتانحامون» اتانىپ كەتكەن «التىن ادام» بولىپ تابىلادى. التىن ادام قازاقستاننىڭ تاريحي-مادەني قۇندى جادىگەرى بولىپ تابىلادى»، - دەدى بەيبىت يسابايەۆ.

ءوز كەزەگىندە ازەربايجان رەسپۋبليكاسى مادەنيەت ءمينيسترىنىڭ ورىنباسارى سيەۆدا مامەدالي «ءبىزدى ورتاق تامىر، ورتاق ءداستۇر، ورتاق مادەنيەت جاقىنداستىرادى. بۇل جاقىندىق ءبىزدىڭ كوشباسشىمىز گايدار اليەۆ پەن نۇرسۇلتان نازاربايەۆتىڭ ورتاق بايلانىسىنىڭ ناتيجەسى. ءدال سول بايلانىستى، تاتۋ كورشىلىكتى قازىرگى پرەزيدەنتىمىز يلحام الييەۆ مىرزا دا جالعاپ كەلەدى»، - دەپ ەكى ەل اراسىنداعى ساياسي بايلانىستىڭ دا مىعىم ەكەنىنە توقتالدى.

ايتا كەتەيىك، حالىقارالىق «التىن ادامنىڭ الەم مۋزەيلەرىنە شەرۋى» اتتى جوبا اياسىندا ۇيىمداستىرىلىپ وتىرعان «ۇلى دالا مۇراسى: زەرگەرلىك ونەر جاۋھارلارى» كورمەسىندە تانىستىرىلاتىن زەرگەرلىك ونەر تۋىندىلارى - ەۋرازيانىڭ دالالىق مادەنيەتىنىڭ وزىندىك ءستيلى مەن ەرەكشەلىكتەرىن بەينەلەيتىن اشەكەي- بۇيىمدار مەن بىزگە اتى بەلگىسىز تاريح تەرەڭىندە قالعان شەبەرلەردىڭ قولدارىنان شىققان تۋىندىلاردىڭ ءبىر بولىگى عانا.

«التىن ادامنىڭ الەم مۋزەيلەرىنە شەرۋى» حالىقارالىق كورمە جوباسىنىڭ مارشرۋتىنا ت م د، ازيا، ەۋروپا جانە امەريكا ەلدەرى كىرەدى. جۇزەگە اسىرۋ مەرزىمى: 2018-2021 -جىلدار.