قىتايلىق كوركەم جازۋ بايقاۋىندا قازاقستاندىقتار توپ جاردى

بەيجىڭ. قازاقپارات - شىعىس قىتاي پەداگوگيكالىق ۋنيۆەرسيتەتىنىڭ (شاڭحاي) ستۋدەنتى دانا تويباعاروۆا جانە قىتاي مۇناي ۋنيۆەرسيتەتىنىڭ (چيڭداۋ) ەكىنشى كۋرس ماگيسترانتى ەرعالي سايان ۇلى شاڭحاي ىنتىماقتاستىق ۇيىمى ەلدەرى اراسىندا وتكەن «گوجەن كۋبوگى» قىتايلىق كالليگرافيا بايقاۋىندا ءبىرىنشى ورىن الدى، دەپ حابارلايدى قازاقپارات اگەنتتىگىنىڭ قىتايداعى مەنشىكتى ءتىلشىسى.

ەكىنشى ورىن دا قازاقستاندىق رۋسلان تولەنوۆقا بۇيىردى. ءۇشىنشى ورىندى قىتاي پەداگوگيكالىق ۋنيۆەرسيتەتىنىڭ ستۋدەنتى ءمادينا بالاعۇلوۆا جەڭىپ الدى.

«مەن «حيميالىق ينجەنەريا جانە تەحنولوگيا» ماماندىعىنىڭ ماگيسترانتىمىن. باكالاۆر دارەجەسىن قانىش ساتپايەۆ اتىنداعى قازاق ۇلتتىق تەحنولوگيالىق ۋنيۆەرسيتەتىندە العانمىن. قازاقستاندا كونفۋتسي ينستيتۋتىنا ءجيى باراتىنمىن. 9-10 -ماۋسىم كۇندەرى چيڭداۋ قالاسىندا وتەتىن ش ى ۇ سامميتىنە ۆولونتەرلىققا جازىلىپ قويدىم. ەگەر مەنى قابىلداسا، سامميتكە قاتىسا الامىن»، - دەدى ەرعالي سايان ۇلى قازاقپارات تىلشىسىنە بەرگەن سۇحباتىندا.

بايقاۋدى «جەنمين حۋاباو» باسپاسى مەن قىتاي اقپاراتتىق ينتەرنەت- ورتالىعى قىتاي مادەنيەتىن ناسيحاتتاۋ ماقساتىندا ۇيىمداستىرعان. وعان قازاقستان، قىرعىزستان، تاجىكستان، وزبەكستان، رەسەي، بەلارۋس، ءۇندىستان، پاكىستان، ازەربايجان، ارمەنيا، كامبوجدا، شري-لانكا ەلدەرىنەن 40-قا جۋىق ادام قاتىستى.

قىتايلىق كالليگرافيا - ەروگليفتەردى اسەرلى ەتىپ جازۋ ونەرى. شىعىستا كالليگرافياعا ەرەكشە ءمان بەرگەن جانە بۇل جۇمىس ادامنىڭ رۋحاني دامۋىنا ىقپال ەتەدى دەپ ساناعان.