قازاقستاندا عيبادات ۇيلەرىنەن تىس جەرلەردە نەكە قيۋعا جول بەرىلمەيدى
دەپ حابارلايدى قازاقپارات ءتىلشىسى.
«عيبادات ۇيلەرىنەن تىس جەرلەردە نەكەنى قيۋ نەمەسە توقتاتۋ بويىنشا ءدىني جورالار مەن رەسىمدەردى جاساۋعا جول بەرمەۋ ەسكەرىلگەن. ءدىني جولمەن نەكەگە تۇرۋعا نيەت بىلدىرگەن ادامداردىڭ بىرەۋى عيبادات عيماراتىنا كەلە المايتىن جاعدايدا (اۋىر ناۋقاستانۋى، مۇگەدەكتىگى، باس بوستاندىعىنان ايىرۋ ورىندارىندا بولۋى)، بۇل ءدىني ءراسىمدى مەديتسينالىق نەمەسە وزگە دە ۇيىمدا نەكەگە وتىراتىن ادامداردىڭ قاتىسۋىمەن تىركەلگەن ءدىني بىرلەستىكتىڭ وكىلى جۇرگىزە الادى»، - دەپ توقتالدى مينيستر.
وسى ورايدا ول اتالعان تالاپتى بۇزعاندارعا ايىپپۇل سالىناتىنىن جەتكىزدى.
سونىمەن قاتار، زاڭ جوباسى اياسىندا شەتەلدەردە ءدىني ءبىلىم الۋ رەتتەلەتىن بولادى. جوباعا قازاقستان ازاماتتارىنىڭ شەت مەملەكەتتەردە ءدىني ءبىلىم الۋىنا ەلىمىزدە جوعارعى ءدىني ءبىلىم العاننان كەيىن عانا جول بەرىلەتىنى تۋرالى نورما ەنگىزىلەدى. دەگەنمەن، حالىقارالىق شارت نەگىزىندە، سونداي- اق تىركەلگەن ءدىني بىرلەستىكتەردىڭ قازاقستاندا ءدىني ءبىلىم بەرۋ ۇيىمدارى بولماعان جاعدايدا بۇل تالاپتان تىس شەتەلدە ءدىني ءبىلىم الۋعا بولادى.
«ءدىني بىرلەستىكتەردىڭ قارجى قىزمەتىنىڭ اشىقتىعىن قامتاماسىز ەتۋ بويىنشا نورمالار ۇسىنىلدى. وسى ماقساتتا جوباعا ولاردىڭ ىشكى قارجىلىق ەسەپتەرىن مىندەتتى تۇردە جۇرگىزۋ تالاپتارى ەنگىزىلدى. وسى ەسەپتەردى بۇقارالىق اقپارات قۇرالدارىندا جىل سايىن جاريالاۋ كوزدەلگەن. حالىقارالىق تاجىريبەدە بۇل كەڭىنەن قولدانىلاتىن زاڭنامالىق تالاپ. اتالعان ماسەلە ءبىزدىڭ قوعامدا دا تالاي مارتە كوتەرىلگەن بولاتىن»، - دەدى دارحان كالەتايەۆ.
بۇدان بۇرىن حابارلانعانداي، جالپى وتىرىستا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
فوتو: muslim.kz
اۆتور: رۋسلان عابباسوۆ
