جىلدام ينتەرنەت قانداي اۋىلدارعا تارتىلادى

ق ر اقپارات جانە كوممۋنيكاتسيالار ءمينيسترى داۋرەن ابايەۆتىڭ ايتۋىنشا، بۇگىندە پەرسپەكتيۆتى، ياعني بولاشاعى بار ەلدى مەكەندەردىڭ ءتىزىمى جاسالدى. اتالعان جەرلەردە حالىقتىڭ سانى وسەدى دەگەن بولجام بار.
«ءدال وسى ەلدى مەكەندەرگە ءبىز جوعارى جىلدامدىعى بار ينتەرنەتتى تارتىپ بەرەمىز. سوندا شامامەن 2 ميلليون ادام جىلدام ينتەرنەنتكە قوسىلا الادى. قالعان اۋىلداردىڭ ماسەلەسىن ءالى دە قاراستىراتىن بولامىز. سپۋتنيك ارقىلى بەرەمىز بە؟ جوق، الدە ارنايى قۇرىلعىلاردى جاڭارتامىز با؟ ول جاعىن ءالى دە تالقىلاۋدان وتكىزەمىز. شاعىن اۋىلدارعا ۇيالى بايلانىس پەن ينتەرنەتتى تارتقان ەكونوميكالىق تۇرعىدا ءتيىمسىز ەكەنىن مويىنداۋىمىز كەرەك. سەبەبى جەلىنى تارتۋعا كەتكەن قارجى اقتالمايدى» ، - دەدى د. ابايەۆ حالىققا ەسەپ بەرۋ كەزدەسۋىندە.
ءمينيستردىڭ سوزىنە قاراعاندا، شالعاي جاتقان ەلدى مەكەندەردى ۇيالى بايلانىسپەن قامتۋ شارالارى دا جالعاسا بەرەدى. قازىرگى كەزدە ءبىر مىڭ ادامنان اساتىن ەلدى مەكەندەردە ۇيالى بايلانىس بار. ەندىگى ماقسات - تاعى 500 ەلدى مەكەندى ۇيالى بايلانىسپەن قامتۋ. ۇيالى بايلانىس وپەراتورلارى دا ءتيىستى مىندەتتەمەلەردى الدى. 2020 -جىلعا دەيىن بارلىق ەلدى مەكەندەر ۇيالى بايلانىسپەن قامتىلادى دەگەن جوسپار بار.
«نەگىزى، ۇيالى بايلانىس وپەراتورلارى ءۇشىن دە شاعىن اۋىلدارعا قىزمەت كورسەتكەن ءتيىمسىز. سەبەبى ادام از بولعان سايىن تاريف قىمباتتايدى. مىسالى، ءۇندىستاندا ۇيالى بايلانىستىڭ باعاسى قىمبات ەمەس. سەبەبى حالىق كوپ، ادامدار تىعىز تۇرادى. دەليدىڭ وزىندە 15 ميلليون ادام بار. ونىڭ اينالىسىندا دا ءبىراز حالىق تۇرادى. بىزدە ولاي ەمەس. استانادان 100 شاقىرىم شالعاي جەرلەردە اۋىلدار از. حالقى دا كوپ ەمەس. سوعان قاراماستان، ءبىز ۇيالى بايلانىس وپەراتورلارىنا ناقتى مىندەت قويدىق. ولار ءاربىر اۋىلدى ۇيالى بايلانىسپەن قامتۋعا مىندەتتى»، - دەپ اتاپ كورسەتتى د. ابايەۆ.
ايتا كەتەيىك، كەزدەسۋ كەزىندە مينيستر ابايەۆ كەلەسى جىلى تىركەلمەگەن تەلەفوندارعا ۇيالى بايلانىستىڭ قوسىلمايتىنىن تاعى ءبىر مارتە ەسكە سالدى. تەلەفونداردى تىركەۋ شارالارى جىلدىڭ ورتاسىندا باستالادى.
اۆتور: ارمان اسقاروۆ