داۋرەن ابايەۆ جۋرناليستەردى باسپانامەن قامتۋدىڭ ماشاقاتى تۋرالى ايتىپ بەردى

«بىزدە بۇقارالىق اقپارات قۇرالدارىنىڭ 95 پروتسەنتى - جەكەمەنشىك كومپانيالار. سول سەبەپتى ولار باسپانامەن قامتۋ ماسەلەسىن وزدەرى شەشۋى كەرەك. مىسالى، مۇعالىمدەردىڭ بارلىعى بيۋدجەتتىك قىزمەتكەرلەر بولىپ سانالادى. ال جۋرناليستەردىڭ باسىم بولىگى اتالعان ساناتقا جاتپايدى. وسى ماسەلەنى قالاي شەشەمىز؟ جۋرناليستىڭ مارتەبەسىن قالاي انىقتايمىز؟ ەندى، قازىرگى كەزدە مەملەكەت باسپانامەن قامتۋعا قاتىستى ءبىراز شارالاردى قولعا الىپ جاتىر عوي. سونىڭ ىشىندە «7-20-25» باعدارلاماسى دا بار»، - دەدى د. ابايەۆ حالىققا ەسەپ بەرۋ كەزدەسۋى كەزىندە.
ءمينيستردىڭ ايتۋىنشا، مەملەكەتكە قارايتىن بۇقارالىق اقپارات قۇرالدارىن باسپانامەن قامتۋ جايى نازاردان تىس قالمايدى.
«ول ماسەلە ءبىر جەردە شەشىلەدى، ەندى ءبىر جەردە شەشىلمەي جاتادى. سەبەبى جاتاقحانا بار. دەگەنمەن، ءبىز مينيسترلىككە قاراستى ءاربىر ۇيىمنىڭ باسپانا ماسەلەسىن جەكە-جەكە قارايتىن بولامىز. ناقتى ۇسىنىستار بولسا، ءبىز ءاردايىم قولداۋعا دايىنبىز. ونداي ۇسىنىستار بار»، - دەپ اتاپ كورسەتتى د. ابايەۆ.