جاڭا باسشى كەلسە قىزمەتكەرلەر نەگە اۋىسادى

الماتى. قازاقپارات - الماتىدا قالالىق قوعامدىق كەڭەس وتىرىسىندا دەنساۋلىق ساقتاۋ باسقارماسىنىڭ 2017 -جىلعى جۇمىس ناتيجەسى تۋرالى ايتىلدى، دەپ حابارلايدى قازاقپارات ءتىلشىسى.
None
None

جيىن بارىسىندا كەڭەس مۇشەلەرى باسقارما باسشىسى سەرىكبول مۋسينوۆكە جاڭا باسشىنىڭ كەلۋىمەن نەگە قىزمەتكەرلەر جۇمىستان كەتەتىنى تۋرالى ساۋال قويدى.

«وتكەن جىلى قالاداعى مەديتسينالىق مەكەمەلەردە ءتۇرلى سەبەپتەرگە بايلانىستى 2 ايدا 178 قىزمەتكەر جۇمىستارىنان بوساتىلعان نەمەسە باسقا ۇيىمعا اۋىسقان. وسىنداي ولقىلىقتىڭ ورنىن قالاي تولتىرۋعا بولادى؟»، - دەدى قوعامدىق كەڭەس مۇشەلەرى.

باسقارما باسشىسى مامانداردىڭ جۇمىستان بوساۋىنا ءبىر عانا سەبەپ مۇرىندىق بولعانىن ايتتى.

«كوماندالىق پرينسيپپەن قىزمەت اۋىستىرۋعا تىيىم سالىنادى. بيىلعى قىزمەت كادرلىق تاعايىنداۋلارعا كەلسەك، قارجىلىق-شارۋاشىلىق جۇمىستارىندا زاڭ بۇزۋشىلىقتار بولعان. ءبىز بەلگىلى ءبىر زاڭ بۇزۋشىلىقتى كورسەك، وعان نەمقۇرايدى قاراي المايمىز. ءبىز بيۋدجەت اقشاسىن ءتيىمدى جۇمساۋىمىز كەرەك»، - دەدى سەرىكبول مۋسينوۆ.

باسقارما باسشىسى سونداي-اق، 20 جاستاعى جاس بوسانعان ايەلدىڭ ولىمىنەن سوڭ جۇمىستان شىعارىلعان پەريناتالوگيا جانە بالالار كارديوحيرۋرگياسى ورتالىعىنىڭ باسشىسى ەلميرا جاكاشەۆاعا قاتىستى پىكىر ايتتى.

«دارىگەر ماماندىعى بولەك نارسە. ءبىز ول كىسىنى دارىگەر رەتىندە جوعارى باعالايمىز. الايدا، مەديتسينالىق مەكەمەنى باسقارۋ ول بولەك اڭگىمە. ول ءۇشىن باسقارۋشى مامان بولۋ كەرەك. ال باسقارۋشى رەتىندە وعان تاعار كىنامىز كوپ. ول (ەلميرا جاكىشەۆا - اۆت) قارجىلىق-شارۋاشىلىق قىزمەت كەزىندە كوپ زاڭ بۇزۋشىلىققا جول بەرگەن. بۇل ماسەلەگە قاتىستى قازىر قۇزىرلى ورگان وكىلدەرى تەكسەرۋ جۇرگىزىپ جاتىر. ونىڭ ورنىنا تاعايىندالعان جاڭا باسشى تاجىريبەسى وتە كوپ. بۇل قىزمەتتىڭ تالابىنان تولىق شىعادى دەپ ويلايمىن»، - دەدى س. مۋسينوۆ.

ايتا كەتۋ كەرەك، پەرزەنتحانا ورتالىعىنا جاڭا باسشى رەتىندە بىلىكتى اكۋشەر-گينەكولوگ عاني بودىقوۆ كەلدى. مۇنىڭ الدىندا ول №5 -پەرزەنتحانانى باسقارىپ كەلگەن.

سونىمەن قاتار، الماتى قالالىق ونكولوگيالىق ورتالىعىنا دا جاڭا باسشى تاعايىندالدى. بۇل قىزمەتكە ىزماعامبەتوۆ نۇرسۇلتان كەلدى. مۇنىڭ الدىندا ورتالىقتى دامير داۋلەتبايەۆ باسقارىپ كەلگەن بولاتىن.

№7 -قالالىق اۋرۋحانانىڭ باسشىلىعىنا رامازانوۆ ماناس ەمبەرگەن ۇلى كەلدى. اتالعان اۋرۋحانانىڭ باسشىسى قىزمەتىن بۇعان دەيىن مارات شادىباي ۇلى ابدۋللايەۆ اتقارعان.

قازىر №5 -پەرزەنتحانانىڭ باسشىسى مىندەتىن ۋاقىتشا مۇحامەتجانوۆا جانار اتقارىپ وتىر.

سوڭعى جاڭالىقتار