جەتىسۋدا جىل بويى جۇمىس ىستەيتىن تاۋ شاڭعى كۋرورتى اشىلماق

تالدىقورعان. قازاقپارات - الماتى وبلىسىنىڭ تالعار اۋدانىنداعى تاۋ شاڭعى كۋرورتىنىڭ جوباسى وبلىس اكىمى اماندىق باتالوۆقا تانىستىرىلدى، دەپ حابارلايدى قازاقپارات ءتىلشىسى.

جوباعا باستاماشى بولعان «Alina» كومپانيالار توبىنىڭ پرەزيدەنتى ەرلىك بالفانبايەۆ قۇرىلىس جوسپارى مەن نىسان ماكەتىن كورسەتىپ، بايانداپ بەردى.

ە. بالفانبايەۆتىڭ ايتۋىنشا، جوبا اياسىندا 12 اسپالى جول، ۇزىندىعى 31 شاقىرىم بولاتىن تاۋ شاڭعى تراسساسى، سول سياقتى 700 توسەك- ورىندىق قوناق ءۇي، مەيرامحانالار، كافە جانە باسقا دا نىساندار سالۋ كوزدەلگەن. كەلۋشىلەر سانى جىلىنا 724 مىڭ ادام، ياعني كۇنىنە 12 مىڭ ادام بولادى دەپ كۇتىلۋدە. 600-دەن استام جاڭا جۇمىس ورنى قۇرىلىپ، تارتىلاتىن ينۆەستيسيا كولەمى 31 ميلليارد تەڭگە بولادى دەپ مەجەلەنىپ وتىر. كەشەننىڭ باستى ەرەكشەلىگى - ونىڭ جىل بويى ۇزدىكسىز جۇمىس ىستەيتىندىگىندە.

«تاۋ شاڭعى كۋرورتىنىڭ جۇمىسى جىل ماۋسىمدارىنا تاۋەلدى ەمەس. قىسقى كەزەڭدە تاۋ شاڭعىسى، حوككەي، كونكيمەن سىرعاناۋ قىزىق بولسا، جازدا ۆەلوسيپەد تەۋىپ، اتقا مىنۋگە بولادى. ياعني، شاڭعى جولدارى جازدا ۆەلوسيپەد جولى رەتىندە پايدالانىلادى. وسىلايشا كۋرورت تۋريستەردىڭ جىل بويى دەمالۋىنا قولايلى ورىن بولماق»، - دەيدى ە. بالفانبايەۆ.

وبلىس اكىمى اماندىق باتالوۆ ءتۋريزمدى دامىتۋ جوسپارلانعان جۇمىستىڭ باسىم باعىتتارىنىڭ ءبىرى ەكەنىن اتاپ ءوتتى:

«الماتى وبلىسىنا كۇنى كەشە جاساعان ساپارىندا مەملەكەت باسشىسى ءوڭىردىڭ تۋريستىك الەۋەتىن ءتيىمدى پايدالانىپ، ءتۋريزمدى، سونىڭ ىشىندە تاۋ تۋريزمىن دامىتۋعا نازار اۋدارۋدى تاپسىردى. بۇگىن تانىستىرىلعان تاۋ شاڭعى كۋرورتىنىڭ جوباسى وسى مىندەتتى ورىنداۋدا اسا ماڭىزدى دەپ ەسەپتەيمىن. ونىڭ جۇمىسى جاپپاي تۋريستەر تارتۋ ىسىنە ىقپال ەتەتىن بولادى. وعان قوسا جاڭا جۇمىس ورىندارى اشىلىپ، ينۆەستيسيا تارتىلادى، ەڭ باستىسى حالىقتى سالاماتتى ءومىر سالتىنا تارتۋعا جاردەمدەسەدى»، - دەدى ا. باتالوۆ.

وبلىس اكىمى ينجەنەرلىك ينفراقۇرىلىمداردى دامىتۋ ماسەلەلەرى جاعىنان قولداۋ كورسەتىلەتىنىن ايتتى. بۇل اتاپ ايتقاندا اۆتوكولىك جولدارىنا، ەلەكترمەن، سۋمەن قامتۋعا جانە كارىز جۇيەلەرىنە قاتىستى.

فوتو: prokatt.com