نۇرسۇلتان نازاربايەۆ سوچيدە فۋتبولدان الەم چەمپيوناتى تۋرالى ايتتى
«كەلەسى ايدان رەسەيدە عالامشاردىڭ ەڭ باستى سپورتتىق سايىستارىنىڭ ءبىرى فۋتبولدان الەم بىرىنشىلىگى باستالاتىن بولادى. عالامشارلىق اۋقىمداعى ۇلكەن شارا. ءبىز رەسەيلىك تاراپقا ونى تاماشا وتكىزۋگە، ال رەسەيلىك فۋتبولشىلارعا جەڭىس تىلەيمىز»، - دەدى قازاقستان پرەزيدەنتى جوعارى ەۋرازيالىق ەكونوميكالىق كەڭەستىڭ كەزەكتى وتىرىسىندا.
«رەسەيلىك تاراپ قايتالانباس مەرەكەلىك اتموسفەرا قالىپتاستىرىپ، وسىناۋ ماڭىزدى شارانى ەڭ جوعارى دەڭگەيدە وتكىزەرىنە سەنىمدىمىن. ءبىز بۇل شاراعا شاقىرىلامىز دەپ ۇمىتتەنەمىز»، - دەدى نۇرسۇلتان نازاربايەۆ رەسەي پرەزيدەنتى ۆلاديمير پۋتينگە قاراتا.
ەلباسىنىڭ بۇل سوزىنە جاۋاپ بەرگەن رەسەي پرەزيدەنتى «بارلىقتارىڭىز دا شاقىرىلدىڭىزدار»، - دەپ جاۋاپ بەردى.
فۋتبولدان 2018-جىلعى الەم چەمپيوناتى 14- ماۋسىمنان باستاپ 15- شىلدەگە دەيىن رەسەيدىڭ 11 قالاسىنداعى 12 ستاديوندا وتەتىن بولادى.
ايتا كەتەيىك، رەسەيدىڭ سوچي قالاسىندا مەملەكەت باسشىلارىنىڭ قاتىسۋىمەن جوعارى ەۋرازيالىق ەكونوميكالىق كەڭەستىڭ (ج ە ە ك) كەزەكتى وتىرىسى وتۋدە. شاراعا قازاقستان پرەزيدەنتى نۇرسۇلتان نازاربايەۆ، رەسەي باسشىسى ۆلاديمير پۋتين، قىرعىزستان پرەزيدەنتى سوورونباي جەەنبەكوۆ، بەلارۋس باسشىسى الەكساندر لۋكاشەنكو جانە ارمەنيا پرەمەر-ءمينيسترى نيكول پاشينيان قاتىسۋدا.
باس قوسۋدا ەۋرازيالىق ەكونوميكالىق وداق (ە ا ە و) اياسىنداعى كوپباعىتتى ىنتىماقتاستىقتىڭ ءتۇرلى اسپەكتىلەرى، ۇيىمنىڭ ۇيىمداستىرۋ-كادرلىق باعىتتاعى شارالارى مەن اعىمداعى جۇمىس بارىسى ءسوز بولادى دەپ كۇتىلەدى. كۇن تارتىبىنە 15 ماسەلە قويىلعان. ولاردىڭ ەكەۋى شاعىن قۇرامدا قارالادى.
