مارالدى كولىنىڭ جاعاسىنا كيىز ءۇي قالاشىعى بوي كوتەرەدى

بۇل تۋرالى اگەنتتىككە شارباقتى اۋدانى اكىمىنىڭ ورىنباسارى حاسار قابىلبەكوۆ ءمالىم ەتتى، دەپ حابارلايدى pavlodarnews.kz.
«قازىرگى كەزدە بيۋدجەت ەسەبىنەن پاۆلودار - شارباقتى تاسجولىنان كولبۇلاق اۋىلىنا دەيىن 4,7 شاقىرىم جول سالىنۋدا. ال كولبۇلاق اۋىلىنان كولدىڭ باسىنا دەيىن 2,7 شاقىرىم قاشىقتىققا توق(ەلەكتر) جەلىسى تارتىلىپ جاتىر»، - دەدى اكىمنىڭ ورىنباسارى.
حاسار قابىلبەكوۆتىڭ ايتۋىنشا، دەمالىسقا ارنالعان وزگە جۇمىستاردى ينۆەستورلار اتقارۋدا. كەلگەن قوناقتار دەمالاتىن كيىز ءۇي قالاشىعى سالىنباق. سونداي-اق اكۆاپارك سالۋ دا جوسپارلانىپ وتىر. جاعاجاي اۋماعى كەڭەيتىلەدى. «ويتكەنى وتكەن جىلى كەلۋشىلەر سانى ارتىپ جاعاجاي تارلىق ەتكەن بولاتىن. بيىل ودان دا كوپ ادام كەلەدى دەپ كۇتىلۋدە. وعان قوسا، بىلتىرعى جىلى اياقتالماعان جۇمىستار اياقتالادى. ءبارىن دە شومىلۋ ماۋسىمى باستالعانشا ءبىتىرۋدى جوسپارلاپ وتىرمىز. سونىمەن قاتار، ينۆەستور بولاشاقتا ساناتوريا اشۋ ماقساتىندا بىلتىرعى جىلى 65 مارال اكەلگەن بولاتىن. بۇگىنگى تاڭدا مارالدار تولدەپ جاتىر»، - دەيدى حاسار قابىلبەكوۆ.
ايتا كەتەيىك، وتكەن جىلى مارالدى كولىنە كەلۋشىلەر سانى كۇنىنە 3000-نان اسقان.