اعارتۋشى- عالىم مۇحتار ارىنعا ەسكەرتكىش ورناتىلدى

سارقان اۋدانىنداعى باقالى اۋىلىندا بوي كوتەرگەن ءمۇسىندى عالىمنىڭ ۇرپاقتارى «بولاشاققا باعدار: رۋحاني جاڭعىرۋ» ماقالاسىنىڭ «تۋعان جەر» كىشى باعدارلاماسى اياسىندا ورناتتى.
مۇحتار ارىن جەتىسۋ ءوڭىرىنىڭ ءتول پەرزەنتى. ول كەڭەستىك كەزەڭدە جابىلىپ قالعان قازاق مەكتەپتەرىن ەل تاۋەلسىزدىگىنىڭ العاشقى جىلدارىندا قايتا اشىلۋىنا، جەر- سۋ اتاۋلارىنىڭ قازاقشا اتالۋىنا ۇلەسىن قوستى. تاريح قويناۋىندا قالعان ارىستار مەن ابىزداردىڭ ەڭبەكتەرىن زەرتتەپ، ونى جارىققا شىعارۋدا تەر توكتى. «ءتىل مەن ءدىندى، تاريح پەن ءداستۇردى، تۋعان جەردى - بەس انىق» دەپ توپتاستىرعان عالىم ەڭبەكتەرىن زيالى قاۋىم ءالى كۇنگە دەيىن زەرتتەپ كەلەدى.
«مۇقاڭ ەكەۋىمىز الماتىدا 23 جاسىمىزدا كەزدەستىك. ءتالىم-تاربيە وتباسىنان باستالادى عوي. ەكەۋىمىزدىڭ بەس بالامىز بار. ءۇش ۇلىمىز، ەكى قىزىمىز بار. مۇقاڭ بار ءومىرىن بىلىمگە، اعارتۋشىلىق سالاسىنا ارناپ، عىلىم سالاسىندا كوپ ەڭبەك ەتكەن جان. ول 1983 -جىلدان ءومىرىنىڭ سوڭىنا دەيىن اقتوبە پەداگوگيكالىق ينستيتۋتىنىڭ رەكتورى بولدى. ول كىسى عىلىمي جۇمىسىن نەمىس تىلىندە ماسكەۋدە قورعاعان. وسى قازاق ەلىم رۋحاني باي بولسا، وركەنيەتتى ەل بولسا ەكەن دەپ ارمانداپ كەتتى. ول كىسىنىڭ جۇرەگى ەلىم، جەرىم، ءتىلىم، ءدىنىم دەپ سوقتى. ءبىراق ءومىرى وتە قىسقا بولدى. 59 جاسىندا ومىردەن وزدى. ويلايمىن بۇل ەسكەرتكىش جاس بالالارعا، ۇرپاقتارعا ۇلگى بولار. كەلەشەكتە وسى مۇقاڭداي جاقسى ادام بولىپ، ادامگەرشىلىگى مول، پاراساتتى، زيالى ادام بولسىن»، - دەدى مۇحتار ارىننىڭ جارى رايحان بەردىقوجا قىزى.
«مۇقاڭ باقالىنىڭ، سارقان اۋدانىنىڭ، الماتى وبلىسىنىڭ مۇقاڭى ەمەس. مۇحتار ارىن ول قازاقتىڭ تۇلعاسى. مۇحتار ارىن ءار جەرگە دە قىمبات. مۇقاڭ تەك ستۋدەنتتەردى تاربيەلەگەن جوق. ول سول تۇستا قازاقتىڭ رۋحىن تاربيەلەۋدە ۇلكەن ۇلەس قوسقان جان. مۇقاڭنىڭ ءبىر ەرەكشەلىگى، ول نەمىس ءتىلىنىڭ مامانى. سوندىقتان ونىڭ بويىندا قازاق وركەنيەتىمەن نەمىس مادەنيەتى بىرگە ءجۇردى. ول اباي مەن گەتەنى بىردەي ءتۇسىندى. ولاردىڭ ۇقساستىقتارىن، ولاردىڭ بۇگىنگى ومىرگە دەگەن ىقپالىنىڭ تەرەڭدىگىن، سول ۇلتتىق مادەنيەتتىڭ تامىرىنان ۇلكەن كۇش العاندىعىن ايتىپ، حالىققا ءتۇسىندىردى»، - دەدى ەسكەرتكىشتىڭ سالتاناتتى اشىلۋىندا ءسوز سويلەگەن پروفەسسور، زامانداسى امانگەلدى ايتالى.
مۇحتار عالي ۇلى كوزى ءتىرى بولعاندا 20 -مامىردا 82 جاسقا تولار ەدى. اعارتۋشى الماتى وبلىسىنىڭ سارقان اۋدانىنا قاراستى باقالى اۋىلىندا جەرلەنگەن.