مامامدى قاتتى ساعىنىپ ءجۇرمىن - ديماش قۇدايبەرگەن

اقتوبە. قازاقپارات - قىتايدا جۇرگەن ءانشى ديماش قۇدايبەرگەن اجەسى ميۋا نيزامۋتدينوۆاعا ساعىنىشىن جەتكىزىپ، انالار مەرەكەسىمەن قۇتتىقتادى، دەپ حابارلايدى قازاقپارات ءتىلشىسى.

ديماش قۇدايبەرگەن تۋعان جەرى اقتوبەگە وسى جىلدىڭ قاڭتار ايىندا كەلىپ، ءبىر اپتا دەمالدى. بۇعان دەيىن حابارلاعانىمىزداي، اقتوبەگە كەلگەن كەزدە ۇستازدارىنا باردى، ءبىلىم العان احمەت جۇبانوۆ اتىنداعى مۋزىكالىق كوللەدجدە بولدى. ال بۇگىن ول اناسىن ساعىنعانىن ايتىپ، جىلى لەبىزىن بىلدىرگەن.

 «مامامدى قاتتى ساعىنىپ ءجۇرمىن. اقتوبەدە كۇن جىلى سياقتى، مامام - باقشاسىندا. «انانىڭ ويى ۇيادا، بالانىڭ ويى قيادا» دەپ حالىق قالىپ ايتپاعان دەپ بىلەمىن.... بالا كەزدە دوستارىممەن بىرگە ويناپ كەلۋگە سۇرانۋ ءۇشىن اۋلادا ءوسىپ تۇرعان كوكونىستەر مەن جەمىستەرگە سۋ قۇيىپ، رەسمي تۇرعىدا ۇيدەگى «boss» پاپامىزعا، سونان سوڭ مامامىزعا كورسەتىپ بارىپ كەتەتىنبىز... مامام ءۇيدىڭ قاسىندا دوستارىممەن فۋتبول ويناپ جۇرگەن مەنى «ساباعىڭا دايىندال» دەپ شاقىراتىن. حالىق دانالىعى - «انانىڭ الاقانى بالاعا ايدىندى قونىس». كەزىندە مامامىز ساباق بەرىپ، قىزمەت جاساعان كەزدە وڭىردەگى تانىمال، ىزدەنىمپاز مۇعالىمدەردىڭ ءبىرى بولعان. «ۋچيتەل مەتوديست» دەگەن بىرنەشە بەلگىلەرى دە بار. مانسابى ورلەپ تۇرعان شاعىندا مەن دۇنيەگە كەلدىم. سول كەزدە اعاتايىم مەن سۆەتا اپامنىڭ، مەنىڭ بولاشاعىم ءۇشىن وتباسىمىزبەن ەمبى ەلدى مەكەنىنەن اقتوبە قالاسىنا كوشىپ، 47 جاسىندا بارلىق جۇمىسىن مەنى باعۋ ءۇشىن تاستاعان بولاتىن. بەس جاسىمنان مۋزىكا مەكتەبىنە اپاردى. مامامنىڭ بىزگە سىڭىرگەن ەڭبەكتەرى تۋرالى جازاتىن بولسام، پوست ەمەس، كىتاپ جازۋ كەرەك بولاتىن شىعار. مەن ءۇشىن الەمدەگى ەڭ دانا، ەڭ سۇلۋ، ەڭ دارا ادام - ول مەنىڭ انام. مەرەكەڭىزبەن، جانىم ماما...» ، - دەپ جازدى ديماش قۇدايبەرگەن ينستاگرام پاراقشاسىندا.

 ايتا كەتەيىك، ءانشى تاياۋدا عانا كانن فەستيۆالىنە قاتىسىپ، قىزىل كىلەممەن ءجۇرىپ ءوتتى. قازاقستان پاۆلونىنىڭ اشىلۋىنا قاتىسىپ، ونەر كورسەتتى. ەسكە سالساق، ديماش قۇدايبەرگەن ماۋسىمدا تۋعان جەرى اقتوبەگە كەلەدى. ول «باقىتتى بالا» فەستيۆالىنىڭ گالا كونسەرتىندە ءان شىرقايدى.

اۆتور: التىناي ساعىندىقوۆا