قازاقستاندا ەت جەۋدەن جارىس ءوتتى

بايقاۋ ۇلىتاۋدا «كوكمايسا-2018» ءبىرىنشى ەتنوفەستيۆالى اياسىندا بولدى. جارىسقا بەس ادام قاتىستى، ولار ەلىمىزدىڭ ءار وڭىرىنەن - ماڭعىستاۋ، شىمكەنت، جەزقازعان جانە ۇلىتاۋدان. قاتىسۋشىلار بەس مينۋتتىڭ ىشىندە تاباقتاعى قويدىڭ ەتىن تاۋىسۋعا مىندەتتەلدى. جارىستىڭ جەڭىمپازى - 25 جاستاعى جەزقازعاندىق جىگىت بەكزات جارماعامبەت.
جارىستاعى ءبىرىنشى ورىنى ءۇشىن ول 30 مىڭ تەڭگە، ەكىنشى ورىنداعى ۇلىتاۋلىق قاتىسۋشى 20 مىڭ تەڭگە الدى، ال ءۇشىنشى ورىن شىمكەنتتىك قوناققا بۇيىردى.
وسىدان كەيىن قىمىز ىشۋدەن جارىس ءوتتى. جارىستىڭ بۇل تۇرىندە ءبىرىنشى ورىندى قاراعاندى وبلىسى ۇلىتاۋ اۋدانىنىڭ تۇرعىنى الماس بيماعامبەت يەلەندى. ول توقتاماي 4,3 ليتر قىمىز ءىشتى. «كوكمايسا-2018» ەتنوفەستيۆالى تۇڭعىش رەت ۇلىتاۋدا 6-9- مامىر ارالىعىندا ءوتتى. تانىمال كاسىپكەر مارعۇلان سەيسەمبايدىڭ باستاماسىن قولداعان جەرگىلىكتى اكىمدىكتىڭ قولداۋىمەن وتكەن فەستيۆالگە قازاقستاننىڭ ءار وڭىرىنەن كەلگەن 1500-2000 جۋىق ادام قاتىسىپ، ءۇش-ءتورت كۇن بويى كوشپەندى حالىق عۇرپىمەن تانىسىپ، ىستىق سۋىعىن باستان كەشىردى.
وسى شاراعا قوناق بولىپ كەلگەندەر قاتارىندا مۇرات ابەنوۆ، ءجانيا اۋباكىروۆا، مۇحتار تايجان سىندى تانىمال ادامدار بولدى.
فەستيۆالدىڭ ءبىرىنشى كۇنىندە كەلگەن قوناقتار جەرگىلىكتى حالىقتىڭ تىككەن كيىز ۇيلەرىندە، وزدەرىمەن الىپ كەلگەن شاتىرلارىندا قونىستاندى. كورمەگە قويىلعان قولونەر شەبەرلەرىنىڭ تۋىندىلارىمەن تانىسقان جۇرت، قازاقتىڭ جات بولىپ بارا جاتقان ۇلتتىق ويىندارىن (مەشكەيلەر جارىسى، قىمىز ءىشۋ جارىسى، قاتىن كۇرەس) تاماشالاپ قانا قويماي، وزدەرى دە قاتىسىپ، جۇلدەلى ورىن ءۇشىن تالاستى.
ەتنوفەستيۆال قوناقتارى ۇلىتاۋ جەرىندەگى ەر ەدىگە ءبي مەن توقتامىس حاننىڭ جەرلەنگەن تاۋ شىڭىنا شىعىپ، الاشاحان، جوشىحان جانە دومباۋىل كەسەنەلەرىن ارالادى.