قاراعاندىدا قازا تاپقان ارنايى جاساق ساربازى تۋرالى فيلم ءتۇسىرىلدى

قاراعاندى. قازاقپارات - قاراعاندىدا پوليتسيا قىزمەتكەرلەرى شىنايى وقيعا جەلىسىمەن «دابىل وپەراتسياسى» اتتى فيلم ءتۇسىردى، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

پوليتسەيلەر فيلمدى 17 جىل بۇرىن اسا قاۋىپتى قىلمىسكەرلەردى ۇستاۋ كەزىندە قازا بولعان ارىپتەستەرى، ارنايى جاساق ساربازى الەكساندر يستومينگە ارنادى.

قويىلىم «ارلان» ارنايى جاساق بولىمشەسىنىڭ قۇرىلعانىنا 20 جىل تولۋ كۇنىنە ورايلاستىرىلدى. فيلم سەناريستەرى ارىپتەستەردىڭ ەسكە العان اڭگىمەلەرى مەن مۇراعات قۇجاتتارىن پايدالانعان.

الەكساندر يستومين پوليتسيا قاتارىنا 25 جاسىندا كەلگەن، وعان دەيىن اسكەردە بولىپ كەلىپ، شاحتادا قىزمەت ەتكەن. الدىمەن اباي قالالىق ءى ءى ب- دە ساراپشى-كريميناليست بولىپ ىستەگەن. بەس جىل وتكەن سوڭ پوليتسيا سەرجانتى قاراعاندى قالالىق ءى ءى ب جەدەل ارەكەت ەتۋ روتاسىنا قابىلدانعان.

 2000-جىلدىڭ 26- قازانىندا ارنايى جاساقشى «ۆاليۋت-ترانزيت بانككە» شابۋىل جاساعان كۇدىكتىلەردى قۇرىقتاۋ وپەراتسياسىنا قاتىسقان. الەكساندر يستومين سنايپەرلىك باقىلاۋدا بولعان. قىلمىسكەرلەردى ۇستاۋ كەزىندە اۋىر جاراقات الىپ، كوز جۇمعان.

بىرنەشە جىل بۇرىن اباي قالاسىندا الەكساندر يستومين تۇرعان كارل ماركس كوشەسىنىڭ بويىنداعى ۇيگە ەسكەرتكىش تاقتايشا ورناتىلدى.