كوكشەتاۋلىق ونەرپازدار ەۋروپا ەلدەرىندە ونەر كورسەتپەك
بۇل تۋرالى بۇگىن و ك ق- دا وتكەن باسپا ءسوز ءماسليحاتىندا اقمولا وبلىسىنىڭ اكىمى مالىك مىرزالين ايتتى، دەپ حابارلايدى قازاقپارات ءتىلشىسى.
«جاڭا داۋىردەگى باسەكەگە قابىلەتتىلىك جانە مادەنيەتتىڭ قابىلەتتىلىگى. «زاماناۋي قازاقستان مادەنيەتى» جوباسى اياسىندا وسى جىلدىڭ ناۋرىز ايىندا «كوكشەتاۋ» ۇلتتىق ءبي ءانسامبلى ساۋد ارابياسىندا حالىقارالىق فەستيۆالگە قاتىسىپ كەلسە، «گاككۋ» ءبي ءانسامبلى بىرىككەن اراب امىرلىگىندە وتكەن حالىقارالىق فەستيۆالگە قاتىستى. گران-پري اتاعىن العان «پوليانكا» ءبي ءانسامبلى بيىل فينليانديا جانە شۆەتسيا ەلدەرىنە گاسترولدىك ساپارعا اتتانادى»، - دەدى ءوڭىر اكىمى.
ونىڭ ايتۋىنشا، «كوكشەتاۋ» حالىقتىق ءبي ءانسامبلى يندونەزيادا وتەتىن الەمدىك مادەنيەت فورۋمىنا قاتىسادى.
«2018-جىلى «كوكشەتاۋ» مادەنيەت ءۇيىنىڭ ۇجىمى يۋنەسكونىڭ شاقىرۋى بويىنشا يتاليا، اۆستريا، ماروككو، تۇركيا ەلدەرىنە ساپار شەگەدى. ءبىز سونىمەن قاتار، ءوز جەرلەستەرىمىزدىڭ ادەبي شىعارمالارىن الەمدىك مادەني كەڭىستىككە شىعارۋعا تىرىسامىز. مىسالى، بەلگىلى جازۋشى، دراماتۋرگ ساكەن ءجۇنىسوۆتىڭ شىعارمالارىن اعىلشىن تىلىنە اۋدارۋ جۇمىسى باستالدى»، - دەپ اتاپ ءوتتى مالىك مىرزالين.
