باتىس قازاقستاندا جول اپاتىنان قازا تاپقاندار سانى ەكى ەسە ارتقان
بۇل تۋرالى ب ق و ىشكى ىستەر دەپارتامەنتىندە وتكەن بريفينگتە ايتىلدى، دەپ حابارلايدى قازاقپارات ءتىلشىسى.
ب ق و ءى ءى د جەرگىلىكتى پوليتسيا قىزمەتىنىڭ باسشىسى، پوليتسيا پولكوۆنيگى ماناربەك عابدۋلليننىڭ ايتۋىنشا، وڭىردە جول-كولىك وقيعالارىنىڭ سانى 15,7 پايىزعا (89 دان 75 كە دەيىن) جانە سونىڭ سالدارىنان جاراقات العاندار 12,4 پايىزعا (105 تەن 92 گە دەيىن) تومەندەگەنىنە قاراماستان، قازا تاپقاندار 2 ەسەدەن استامعا (11 دەن 23 كە دەيىن) ءوسىپ كەتىپ وتىر.
تالداۋ كورسەتكەنىندەي، ادام ولىمىنە سوقتىرعان جول اپاتتارىنىڭ كوپشىلىگى جىلدامدىقتى شەكتەن تىس ارتتىرۋ سالدارىنان بولىپ وتىر. بۇرىن جول ناشار بولسا، سوڭعى جىلدارى ونىڭ ساپاسى بىرتە-بىرتە جاقسارىپ كەلەدى. تاقتايداي تەگىس جولدا جۇرگىزۋشىلەر ءتارتىپتى ءجيى بۇزاتىن بولدى. تەك بيىلعى ءتورت ايدىڭ وزىندە جىلدامدىقتى شەكتەن تىس ارتتىرۋ بويىنشا 6 مىڭنان استام قۇقىقبۇزۋشىلىق تىركەلگەن، بۇل وتكەن جىلعىدان 1,5 ەسەگە (3813-تەن 6204-كە جەتكەن) كوپ. بارلىعى ءتورت ايدا 31906 جول ەرەجەسىن بۇزۋشىلىق تىركەلگەن، بۇل وتكەن جىلعىدان (28052) 13,7 پايىزعا ارتىق.
سول سياقتى جول اپاتتارىنىڭ جيىلەۋىنە اۆتوكولىكتىڭ كوبەيۋى، اسىرەسە، جاستار اراسىندا قاراپايىم جۇرگىزۋشىلىك داعدىنىڭ بولماۋى جانە باسقا سەبەپتەر اسەر ەتۋدە.
«وسىعان بايلانىستى ىشكى ىستەر دەپارتامەنتى باسشىلىعى 5 -مامىر - 5 -ماۋسىم ارالىعىندا وبلىس اۋماعىندا جول-كولىك وقيعالارىنىڭ الدىن الۋ باعىتىندا ايلىق جاريالادى. ايلىق بارىسىندا «جىلدامدىق»، «جاياۋ جۇرگىنشى»، «ارنايى بەلگى»، «ماس جۇرگىزۋشى»، «موتوتسيكل» سەكىلدى جەدەل الدىن الۋ شارالارى وتكىزىلەتىن بولادى»، دەدى م. عابدۋللين.
ەسكە سالا كەتەيىك، جول-كولىك وقيعالارى مامىر ايى باستالعاننان بەرى دە تىيىلار ەمەس. مىسالى، 2 -مامىر كۇنى اقجايىق اۋدانى اۋماعىندا اۆتوبۋس پەن جۇك كولىگىنىڭ بەتپە-بەت تۇيىسۋىنەن قوس بىردەي جۇرگىزۋشى قازا تاپسا، تاعى بىرەۋىنىڭ اۋىر جاراقات العانىن جازعان بولاتىنبىز. ودان كەيىن 4 -مامىردا ورال قالاسىندا «لادا پريورا» اۆتوكولىگى قىز بالانى، بۇگىن جۇك كولىگى جاس ءوسپىرىمدى قاعىپ كەتتى.
