قازاقشا كۇرەستەن «باتىس قازاقستان وبلىسىنىڭ بارىسى» انىقتالدى

«قازاقستان بارىسى» ءتۋرنيرىنىڭ وبلىستىق كەزەڭى العاش رەت اقسايدا ءوتىپ، وعان اۋدانداردان ءبىر- بىردەن جانە ورال قالاسىنان ەكى پالۋان قاتىسىپ، باق سىنادى.
بارىنشا قىزۋ وتكەن سايىس بارىسىندا كۇتپەگەن ناتيجە دە بولماي قالعان جوق. مىسالى، وتكەن جىلى «قازاقستان بارىسى» تۋرنيرىنە قاتىسقان قازتالوۆتىق ەرنازار حامزين شيرەك فينالدا سىرىمدىق اسقار نۇرمۇحانوۆتان جەڭىلىپ قالدى.
بيىلعى جارىستاعى جاڭا ەسىم دەپ ورالدىق جيىرما جاسار بەكايدار مەڭدەشەۆتى ايتۋعا بولادى. ول جارتىلاي فينالعا دەيىن سۇرىنبەي جەتكەنىمەن، سودان كەيىن وتىز ءبىر جاسار تاجىريبەلى پالۋان ا. نۇرمۇحانوۆقا ەسە جىبەردى. ەكىنشى جارتىلاي فينالدا ءبورلى اۋدانىنىڭ وكىلى تەمىرلان كولباي تاعى ءبىر ورالدىق ولجاس سۇلەيمەنوۆتى ۇتتى.
قولا جۇلدە ءۇشىن باسەكە اسا تارتىستى ءوتىپ، نەگىزگى ۋاقىتتا ەكى پالۋان تەڭ تۇسكەننەن كەيىن قويان- قولتىق بەلدەسۋدە ب. مەڭدەشەۆتىڭ باعى جاندى.
فينالدا سالماعى شامالاس ت. كولباي مەن ا. نۇرمۇحانوۆ كۇرەستى. تەمىرلان - نەبارى 23 جاستا بولعانىمەن، بۇدان بۇرىن «قازاقستان بارىسى» تۋرنيرىنە قاتىسىپ ۇلگەرگەن ءارى دزيۋدودان دا ولجا سالىپ جۇرگەن قازاقستان قۇراماسىنىڭ مۇشەسى. بۇل بەلدەسۋدە دە ول قارسىلاسىن تازا جەڭىپ، «باتىس قازاقستان وبلىسىنىڭ بارىسى» اتاندى. ءسويتىپ ول ا. نۇرمۇحانوۆپەن بىرگە شىلدە ايىندا ەلباسى جۇلدەسى ءۇشىن استانادا وتەتىن «قازاقستان بارىسى» تۋرنيرىنە جولداما الدى.
ايتا كەتەيىك، 2017 -جىلى «قازاقستان بارىسىنا» ب ق و- دان ت. كولباي مەن ە. حامزين قاتىسقان بولاتىن.