روزا رىمبايەۆا قازاقتىڭ باتىر قىزى ءاليا مولداعۇلوۆانىڭ تۋعان جەرىنە باردى
اقتوبە وبلىسىنا ەسەپ بەرۋ كونسەرتىمەن كەلگەن ءانشى روزا رىمبايەۆا كەڭەس وداعىنىڭ باتىرى ءاليا مولداعۇلوۆانىڭ تۋعان جەرى قوبدا اۋدانى، بۇلاق اۋىلىنا بارىپ، كەيىن ءاليا اۋىلىنداعى پاتريوتتىق ورتالىقتا بولدى. ورتالىقتا قازاقتىڭ باتىر قىزىنا ارنالعان مۋزەي جابدىقتالىپ، بالالار مەن جاس وسپىرىمدەردىڭ سپورتپەن شۇعىلدانۋىنا جاعداي جاسالعان. سول ورتالىقتا اۋىل بالالارىمەن، تۇرعىندارمەن كەزدەستى. كەيىن اۋلاعا اعاش ەكتى.
«اۋىل قاراپايىم. قاراپايىمدىلىعىمەن دە كەرەمەت. ءبىز سوندىقتان دا اۋىلدى اڭسايمىز. اۋىلدىڭ ادامدارىمەن كەزدەسىپ، ولاردان قاراپايىمدىلىقتى كوردىم. ولارعا ونەرىمىزبەن عانا جاۋاپ بەرە الامىز»، - دەدى ءانشى روزا رىمبايەۆا.
ءاليا اۋىلىنداعى ءاليا پاتريوتتىق ورتالىعىنا وزگە وڭىرلەر مەن قالالاردان، اۋداننان وقۋشىلار مەن جاستار، ەلىمىزگە بەلگىلى ادامدار ءجيى بارادى. باتىرلار ەلىندە قوبىلاندى باتىر، ابات بايتاق، يساتاي باتىردىڭ مەموريالدىق كەشەنى مەن جەرلەنگەن جەرى بار.
«ەلىمىزدىڭ باتىس وڭىرىندە تاريحي تۇلعا كوپ، حالقى باتىر. ءوڭىردىڭ ءوزى ەۋروپا مەن ازيانىڭ قيىلىسىندا تۇر. مۇندا دا ءمان مەن ماعىنا بار»، - دەدى روزا رىمبايەۆا.
اۋىل ادامدارىمەن كەزدەسىپ، قوبدا اۋدانىنىڭ تاريحي، مادەني ورىندارىن ارالاعان ءانشى روزا رىمبايەۆا اۋداندىق مادەنيەت ۇيىندە تەگىن كونسەرت قويدى. كونسەرتتە حالىققا كەڭ تانىمال «ءاليا» ءانى دە ورىندالدى.
