سولتۇستىك قازاقستان وبلىسىنىڭ اكىمى وڭتۇستىكتەن كوشىپ كەلەتىن جاستارعا ءۇي سالىپ بەرۋگە ۋادە ەتتى

استانا. قازاقپارات - سولتۇستىك قازاقستان وبلىسىنىڭ اكىمى قۇمار اقساقالوۆ «سەرپىن» باعدارلاماسى اياسىندا كەلىپ جاتقان جاستارعا جەكە ءۇي سالىپ بەرۋگە دايىن ەكەنىن ايتتى، دەپ حابارلايدى قازاقپارات ءتىلشىسى.

 «جۋىردا عانا «سەرپىن» باعدارلاماسى بويىنشا وقىپ جاتقان بالالارمەن كەزدەسكەن ەدىم. بۇگىندە مەملەكەتتىك ۋنيۆەرسيتەت پەن بەس كوللەدجدە  1114 بالا وقىپ جاتىر. بيىل العاش رەت مەملەكەتتىك ۋنيۆەرسيتەتتىڭ تۇلەكتەرى ءوز وقۋىن اياقتايىن دەپ جاتىر. ولاردىڭ وقۋىنا، جاتاتىن جەرلەرىنە، ىشەتىن تاماقتارىنا، سوسىن اۋلىنا جىلىنا ەكى رەت بارىپ كەلۋگە ءبىز بيۋدجەتتەن اقشا ءبولىپ وتىرامىز. سوندا بارلىعى تەگىن دەۋگە بولادى. سوندىقتان ءبىز وسى بالالاردى وقۋدان كەيىن وزىمىزدە قالدىرۋعا تىرىسىپ جاتىرمىز. سوڭعى كەزدەسۋدە مەن ەكى بالاعا بىلاي دەپ ايتتىم، وسى جەردە ۇيلەنىپ، بالالى بولساڭدار، ءبىز سەندەرگە تەگىن ءۇي سالىپ بەرەمىز. وسىنداي ۋادە بەردىك. ارينە، قالادا ەمەس، اۋدان ورتالىعىندا ەمەس. اۋىلعا بارۋ قاجەت»، - دەدى ق. اقساقالوۆ استانادا وتكەن باسپا ءسوز ءماسليحاتىندا.

قازاقپارات تىلشىسىنە سۇحبات بەرگەن وبلىس اكىمى اتالعان باستامانى كەڭىنەن ءتۇسىندىرىپ بەردى. ونىڭ ايتۋىنشا، اۋىلدى جەرگە جۇمىسقا بارعان جاستارعا كاسىپكەرلەر ءۇي سالىپ بەرەدى. الايدا ونى بىردەن جەكە مەنشىككە بەرمەيدى. باس كەزىندە قىزمەتتىك باسپانا رەتىندە راسىمدەلەدى.

«قازىر اۋىل مەكتەپتەرىنە، اۋرۋحانالارعا، فەلدشەرلىك بەكەتتەرگە مامان قاجەت. جاس ماماندار سول جەرگە بارىپ، بالالى بولسا، ءبىز ولارعا تەگىن ءۇي سالىپ بەرەمىز. ول قىزمەتتىك باسپانا بولادى. ارتىنان جەكەشەلەندىرۋگە دە بولاتىن شىعار دەپ ويلايمىز. ونداي باستاما بار. ءۇيدى كاسىپكەرلەر سالىپ بەرەدى. سونىڭ ارقاسىندا اۋىلعا بىلىكتى مامانداردى تارتۋعا بولادى»، - دەدى ق. اقساقالوۆ قازاقپارات تىلشىسىنە بەرگەن سۇحباتىندا.

اۆتور: ارمان اسقاروۆ