قارجى پيراميدالارىنىڭ ءورىس الۋى قارجى جۇيەسىنە سەنىمدى تومەندەتۋدە - سەنات ءتوراعاسى

«بانك جۇيەسى الەمدىك جانە ۇلتتىق ەكونوميكاداعى ءوسىم مەن قۇلدىراۋعا دەر كەزىندە بەيىمدەلە ءبىلۋى ارقىلى مەملەكەتتىڭ قارجىلىق-ەكونوميكالىق احۋالىنا تىكەلەي اسەر ەتەدى. ەلىمىزدى ىلگەرىلەتۋگە باعىتتالعان باعدارلامالاردىڭ تابىستى جۇزەگە اسۋى بانك جۇيەسىنىڭ ءتيىمدى جۇمىسىمەن تىعىز بايلانىستى. سوڭعى كەزدە بانك سەكتورى جۇمىسىنىڭ ساپاسىنا قاتىستى سىن-پىكىرلەر ايتىلۋدا. سىني كوزقاراستاعى وسىنداي پىكىرلەردىڭ قانشالىقتى ورىندى ايتىلعانىن باعامداپ، بۇعان سەبەپ بولعان ناقتى جاعدايلاردى انىقتاۋىمىز قاجەت. دەگەنمەن، بۇگىنگى كۇننىڭ وزىندە بانكتەردىڭ مەنەدجمەنتى كۇردەلى وزگەرىستەردىڭ قىسىمىنا توتەپ بەرە المايدى. جاڭا قارجىلىق ءداۋىردىڭ تالاپتارىنا ساي دەڭگەيىن كورسەتە الماعانىن وكىنىشپەن مويىنداۋىمىز كەرەك. بۇل ءوز كەزەگىندە ەكونوميكالىق جۇيەنىڭ تۇراقتىلىعىنا تەرىس اسەر ەتىپ، حالىقتىڭ قارجى ينستيتۋتتارىنا دەگەن سەنىمىن السىرەتە ءتۇستى»، - دەپ توقتالدى ق. توقايەۆ.
وسى ورايدا ول بيىل قاڭتاردا ەلباسى جولداۋىندا قارجى سەكتورىن قايتا جۇكتەۋ قاجەتتىگىن نۇسقاعانىن ەسكە سالىپ ءوتتى. سونىمەن قاتار بانكتىڭ پورتفەلدى «ناشار» نەسيەلەردەن تازارتۋ جانە بانكتەردەن قارجىنى جىلىستاتۋعا جول بەرمەۋ تالاپتارى قويىلدى.
«قازىرگى كەزدە يپوتەكالىق قارىزداردى قايتا قارجىلاندىرۋ باعدارلاماسى جۇزەگە اسىرىلۋدا. باعدارلاما جيىرما مىڭنان استام ازاماتتىڭ باسىنداعى جالعىز باسپاناسىن ساقتاپ قالۋعا مۇمكىندىك بەرىپ وتىر. وسى باعدارلامانى ىسكە اسىرۋ ارقىلى قارىز الۋشىلارعا تۇسكەن اۋىرتپالىق ايتارلىقتاي ازايتىلدى. ولارعا بانكتەردىڭ الدىنداعى مىندەتتەمەلەرىن ورىنداۋ ءۇشىن ءتيىمدى مۇمكىنشىلىك جاسالىپ وتىر. تاعى ءبىر ايتا كەتەتىن ماڭىزدى ماسەلە حالىقتىڭ قارجىلىق ساۋاتتىلىعىن ارتتىرۋ جۇمىسىن جەتىلدىرۋ جونىندە. سەبەبى جالپىعا بىردەي تۇسىنىكتى قاراپايىم تىلدەگى قارجى سالاسىنداعى اقپاراتتىڭ جەتىسپەۋشىلىگى ازاماتتار تاراپىنان ءتيىمسىز شەشىم قابىلداۋعا اكەپ سوقتىرۋدا»، - دەدى ق. توقايەۆ.
سەنات ءتوراعاسىنىڭ اتاپ وتۋىنشە، قارجىلىق قىزمەتتەر ءتۇرىنىڭ كوبەيۋى، ولاردىڭ كۇن ساناپ كۇردەلەنۋى، الاياقتىق تاسىلدەردىڭ، قارجى پيراميدالارىنىڭ ءورىس الۋى قارجى جۇيەسىنە دەگەن سەنىمدى تومەندەتىپ وتىر.
«ۇلتتىق بانك اتالعان ماسەلەلەرگە كەڭىنەن كوڭىل ءبولىپ، قوردالانعان ماسەلەلەردىڭ وڭتايلى شەشىمىن تابۋ ءۇشىن ەكىنشى دەڭگەيلى بانكتەرمەن كەشەندى جۇمىستار جۇرگىزۋى قاجەت»، - دەدى ول.