وتان قورعاۋشى كۇنى ەكەنىن جۇبايلارىمىزدىڭ ەسىنە سالماساق ۇمىتىپ كەتەدى - ەلباسى ءازىلى

استانا. قازاقپارات - بۇگىن اقوردادا ءبىرقاتار تۇلعالارعا جوعارى اسكەري جانە ارناۋلى اتاقتار، سىنىپتىق شەندەر جانە بىلىكتىلىك سىنىبىن تابىستاعان ەلباسى نۇرسۇلتان نازاربايەۆ ولاردى الداعى وتان قورعاۋشى كۇنى مەرەكەسىمەن قۇتتىقتادى، دەپ حابارلايدى قازاقپارات ءتىلشىسى.

«قازاقستاننىڭ وتان قورعاۋشى كۇنى دەپ 7- مامىردى اتادىق. 1992-جىلى ءدال وسى كۇنى قازاقتىڭ قارۋلى كۇشتەرىن قۇرۋ تۋرالى جارلىققا قول قويعان بولاتىنمىن. سوندىقتان ەر-ازاماتتاردى، وتان قورعاۋشىلاردى ءبىزدىڭ جۇبايلارىمىزدىڭ، اتا-انالارىمىزدىڭ قۇتتىقتايتىن كۇنى ءدال سول كۇن. ەسىنە سالا بەرمەسەك، كەيدە ۇمىتىپ كەتەدى»، - دەپ ازىلدەدى نۇرسۇلتان نازاربايەۆ.

مەملەكەت باسشىسى ءومىرىن اسكەري قىزمەتكە ارناپ، جاس كەزىنەن ءبىلىم الىپ، وقىپ، تەمىردەي تارتىپكە مۇلتىكسىز باعىناتىن ازاماتتاردى كەلە جاتقان مەرەكەلەرىمەن قۇتتىقتادى.

«وسىنداي ەڭبەكتىڭ ارقاسىندا ەڭ جوعارى گەنەرال اتاعىن الۋ ۇلكەن قۋانىش دەپ بىلەمىن. وسى قۋانىشتارىڭىز قۇتتى بولسىن! سىزدەردى، جانۇيالارىڭىزدى، بىرگە ىستەگەن جورا-جولداستارىڭىزدى قۇتتىقتايمىن!»، - دەدى نۇرسۇلتان نازاربايەۆ.

قازاقستان پرەزيدەنتى كەلەسى كەزەكتە بۇگىنگى الەمنىڭ قۇبىلمالى ەكەندىگىن باسا ايتتى.

«ەرتەڭ، ودان ارى كۇنى نە بولارىن ەشكىم دە بىلمەيدى. دەگەنمەن، وق-ءدارىنى قۇرعاق ۇستاپ، بارلىق ۋاقىتتا ءازىر بولۋ، وتانىڭ مەن جەرىڭ ءۇشىن كەز كەلگەن ۋاقىتتا جانىڭدى پيدا ەتۋگە دايىن بولۋ قاجەت. ءبىز، بارلىق ەر-ازاماتتار سول ءۇشىن دۇنيەگە كەلدىك جانە سول ءۇشىن ءومىر سۇرەمىز. ەگەر ادامعا ءومىر بەرىلەتىن بولسا، بىردە ول ءومىر اداممەن قوش ايتىسادى. ءبىز ونىڭ قايدا، قاشان بولارىن بىلمەيمىز. بارلىق ۋاقىتتا دا جاۋىنگەرلەر وتانىن قورعاۋ جولىندا جانىن پيدا ەتۋدى وزدەرىنىڭ باستى پارىزى ساناعان. بۇل قاراپايىم ءسوز ەمەس»، - دەپ اتاپ ءوتتى ق ر پرەزيدەنتى.