ەلەۋسىنوۆتىڭ پروموۋتەرى كاسىبي رينگتەگى كەزەكتى كەزدەسۋگە قاتىستى پىكىر ءبىلدىردى

استانا. قازاقپارات - دانيار ەلەۋسىنوۆتىڭ (1-0, 1 ك و) پروموۋتەرى ەددي حيرن Twitter- دەگى پاراقشاسىندا قازاقستاندىق بوكسشىنىڭ كاسىبي بوكستاعى كەزەكتى كەزدەسۋى تۋرالى جازبا قالدىردى، دەپ جازادى Sports.kz.

«جاڭا شوۋ! ليۋك ۋوتكينس - لوۋرەنس وكولي - دوستاستىق كەزدەسۋى، دانيار ەلەۋسىنوۆتىڭ ۇلى بريتانياداعى دەبيۋتى، بەلوتتي - دويل، تەد چيزمەن - فەليكس كەش جانە وزگە دە كوپتەگەن بىلعارى قولعاپ شەبەرلەرى!» - دەپ جازدى حيرن.

اتالعان بوكس كەشى 6- ماۋسىمدا لوندونداعى York Hall مادەني ويىن-ساۋىق ورتالىعىندا وتەدى. ەلەۋسىنوۆتىڭ قارسىلاسى ازىرگە بەلگىسىز. جەكپە-جەك 6- راۋندقا سوزىلادى.

ايتا كەتەيىك، دانيار ەلەۋسىنوۆ كاسىبي بوكستاعى ءوزىنىڭ العاشقى كەزدەسۋىن نيۋ-يوركتە دەنيەل دجەيكوبس (34-2, 29 ك و) - ماتسەي سۋلەتسكيدىڭ (26-1, 10 ك و) بوكس كەشىنىڭ اياسىندا وتكىزدى. ول 6- راۋندقا ەسەپتەلگەن كەزدەسۋدىڭ ءۇشىنشى راۋندىندا امەريكالىق نوا كيدتى (3-1-1, 2 ك و) نوكاۋتقا جىبەردى.