ماجىلىسمەندەر اۋىل كاسىپكەرلەرىنە نەسيە شارتتارىن قايتا قاراۋدى سۇرادى

استانا. قازاقپارات - ق ر پارلامەنتى ءماجىلىسىنىڭ دەپۋتاتى بەيبىت مامرايەۆ باستاعان ءبىر توپ ماجىلىسمەن «اۋىل شارۋاشىلىعىن قارجىلاي قولداۋ قورى» ا ق- نىڭ نەسيەلەۋ شارتتارىن قايتا قاراۋدى سۇراپ وتىر، دەپ حابارلايدى قازاقپارات ءتىلشىسى.

 بۇگىنگى پارلامەنت ءماجىلىسىنىڭ وتىرىسىندا «نۇر وتان» فراكسياسىنىڭ مۇشەلەرى دەپۋتات بەيبىت مامرايەۆ، شاۆحات وتەمىسوۆ، كارىباي مۇسىرمان، ۆاسيلي ولەينيك ق ر اۋىل شارۋاشىلىعى ءمينيسترى ءومىرزاق شوكەيەۆكە دەپۋتاتتىق ساۋال جولدادى.

«جۋىردا وڭىرلەردە سايلاۋشىلارمەن كەزدەسكەندە پرەزيدەنتتىڭ «بەس الەۋمەتتىك باستاماسىن» حالىقتىڭ قۋانا قابىل الىپ وتىرعانىنا كۋا بولدىق. اۋىل تۇرعىندارى شاعىن نەسيە بەرۋ باستاماسىنا ۇلكەن ءۇمىت ارتىپ وتىر. شوكەيەۆ مىرزا جاقىندا پارلامەنت ماجىلىسىندە 2018-2020 -جىلدارعا ارنالعان رەسپۋبليكالىق بيۋدجەتتى تالقىلاۋ بارىسىندا «اۋىل شارۋاشىلىعىن قارجىلاي قولداۋ قورى» اق ارقىلى 6 مىڭ نەسيە بەرەتىندىگىن مالىمدەگەن بولاتىن. الايدا قازىرگى ۋاقىتتا اۋىلدىقتار اتالعان قور باسشىلىعى 2018 -جىلدىڭ ناۋرىز ايىنا بەكىتكەن نەسيەلەۋ شارتتارىنا تۇسىنبەۋشىلىك بىلدىرۋدە»، - دەيدى دەپۋات.

بەيبىت مامرايەۆتىڭ ايتۋىنشا، «باستاۋ بيزنەس» باعدارلاماسى بويىنشا وقىتىلىپ، جەكە كاسىپكەر رەتىندە تىركەلگەن اۋىل ازاماتتارى اتالمىش قوردان ۇستىمىزدەگى جىلى مال شارۋاشىلىعىمەن اينالىسۋ ءۇشىن نەسيە الا المايتىن بولىپ وتىر.

 «سەبەبى، ولاردىڭ ءىرى جانە ۇساق قارا مال، جىلقى جانە تۇيە ساتىپ الۋىنا رۇقسات ەتىلمەيتىن بولىپ شىقتى. تەك قۇس ءوسىرىپ، بال اراسىن ۇستاۋ ءۇشىن، سونداي- اق اۋىل شارۋاشىلىعى سالاسىنا جاتپايتىن بيزنەستى دامىتۋ ءۇشىن نەسيە بەرىلمەك. ءبىراق، اۋىلدارعا قانشا شاشتاراز جانە مونشا قاجەت؟ اۋىلدىق كاسىپكەرلەردىڭ قانشاسى وسىنداي نىسان اشۋ ءۇشىن نەسيە الۋى مۇمكىن؟ ماسەلەنىڭ وسى جاعى ءجىتى ويلاستىرىلماعان»، - دەيدى ول.

 دەپۋتات ءوز سوزىندە «اۋىل شارۋاشىلىعىن قارجىلاي قولداۋ قورى» ا ق تەك شارۋا قوجالىقتارىن، فەرمەر قوجالىقتارىن جانە اۋىلداعى وندىرىستىك كووپەراتيۆتەردى عانا كەڭىنەن نەسيەلەۋ ۇسىنىسىمەن كەلىسۋ قيىن ەكەنىن ءبىلدىردى.

«اۋىل شارۋاشىلىعىن قارجىلاي قولداۋ قورى» ا ق- نىڭ 2018 -جىلعى نەسيەلەۋ شارتتارى ەلباسىنىڭ شاعىن نەسيە بەرۋدى كوبەيتۋ باستاماسىن كەڭ كولەمدە ىسكە اسىرۋعا كەدەرگى كەلتىرەدى دەپ سانايمىز. وسىعان وراي ۆيتسە- پرەمەر - اۋىل شارۋاشىلىعى مينيسترىنە، «اۋىل شارۋاشىلىعىن قارجىلاي قولداۋ قورى» ا ق ۇستىمىزدەگى جىلى جەكە كاسىپكەرلەردى نەسيەلەۋ شارتتارىن قايتا قاراپ، ءتيىستى تۇزەتۋلەردى ەنگىزۋدى سۇرايمىز»، - دەدى دەپۋتات.

اۆتور: ايان بەكەن ۇلى