ومان سۇلتاندىعىنىڭ استاناسىندا قازاق كينوسىنىڭ اپتالىعى باستالدى
اتالمىش مادەني ءىس- شارا بارىسىندا سوڭعى جىلدارى شىققان وتاندىق رەجيسسەرلەردىڭ تانىمال فيلمدەرى مامىردىڭ بەسىنە دەيىن كورسەتىلەدى، دەپ حابارلايدى قازاقپارات ءتىلشىسى «قازاقفيلم» كينوستۋدياسىنىڭ باسپا ءسوز قىزمەتىنە سىلتەمە جاساپ.
قازاق كينوسى اپتالىعىنىڭ اشىلۋ سالتاناتىنا ومان سۇلتاندىعىنىڭ زيالى قاۋىمى، ىسكەرلىك جانە مادەني ۇيىمدار وكىلدەرى، سونىمەن قاتار ديپلوماتيالىق كورپۋستىڭ وكىلدەرى مەن ومان سۇلتاندىعىندا تۇراتىن قازاقستان ازاماتتارى قاتىسپاق.
قازاقستان رەسپۋبليكاسىنىڭ ومان سۇلتاندىعىنداعى توتەنشە جانە وكىلەتتى ەلشىسى ەرجان مۇقاش اتالعان مادەني ءىس- شارا ق ر پرەزيدەنتى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان مىندەتتەردىڭ ءبىرى - «جاھانداعى زاماناۋي قازاقستاندىق مادەنيەت» جوباسى اياسىندا وتكىزىلىپ جاتقانىن اتاپ ءوتتى. ونىڭ ايتۋىنشا، وسىنداي ءىس- شارالار ەكى ەل اراسىنداعى ەكىجاقتى ىنتىماقتاستىقتى ودان ءارى نىعايتۋعا كەڭ مۇمكىندىك بەرەدى.
«ماسكات قالاسىندا وتەتىن قازاق كينوسى اپتالىعى بۇگىن رەجيسسەر اقان ساتايەۆتىڭ «اناعا اپارار جول» فيلمىمەن اشىلادى. ال 5 - مامىردا وماندىقتار قازاق حاندىعىنىڭ قۇرىلۋى تۋرالى باياندايتىن، رەجيسسەرى رۇستەم ابدىراشيەۆتىڭ «الماس قىلىش» تاريحي فيلمىن تاماشالايتىن بولادى» ، - دەلىنگەن حابارلامادا.
ايتا كەتسەك، قازاقستان رەسپۋبليكاسى مەن ومان سۇلتاندىعى اراسىنداعى ديپلوماتيالىق قاتىناستار 1992 -جىلى 27 - ساۋىردە ورناتىلعان. قازاقستان رەسپۋبليكاسىنىڭ ومانداعى ەلشىلىگى 2009 -جىلى 10 - جەلتوقساندا اشىلعان.
