اقشانى ەلدەن اكەتۋ بەلگىلەرى بار ۆاليۋتالىق وپەراتسيالار تىزبەسى ايقىندالدى

استانا. قازاقپارات - ق ر پارلامەنتى ءماجىلىسىنىڭ دەپۋتاتتارى «ۆاليۋتالىق رەتتەۋ جانە ۆاليۋتالىق باقىلاۋ تۋرالى» زاڭ جوباسىن ەكىنشى وقىلىمدا ماقۇلداپ، سەناتقا جولدادى، دەپ حابارلايدى قازاقپارات ءتىلشىسى.

پارلامەنت ءماجىلىسىنىڭ وتىرىسىندا قارجى جانە بيۋدجەت كوميتەتىنىڭ مۇشەسى دانيا ەسپايەۆا زاڭ جوباسى ءماجىلىستىڭ 11- ساۋىردەگى جالپى وتىرىسىندا ءبىرىنشى وقىلىمدا ماقۇلدانعانىن اتاپ ءوتتى.

«زاڭ جوباسىنىڭ نەگىزگى ماقساتى - ەل ەكونوميكاسىنىڭ قازىرگى دامۋ كەزەڭىنە، ەلىمىزدىڭ الەمدىك جۇيەگە كىرۋىنە جانە د س ۇ- عا ەنۋگە بايلانىستى ۆاليۋتالىق زاڭنامانى جوسپارلى تۇردە وزگەرتۋ بولىپ تابىلادى. زاڭ جوباسىنىڭ مىندەتى - قازاقستان اۋماعىنداعى ۆاليۋتالىق وپەراتسيالاردىڭ مونيتورينگىن كەڭەيتۋ جانە ەسەپ ايىرىسۋدى شەتەلدىك ۆاليۋتادا قامتۋ بولىپ تابىلادى. زاڭ جوباسىندا اقشانى ەلدەن اكەتۋ بەلگىلەرى بار ۆاليۋتالىق وپرەاتسيالار تىزبەسى ايقىندالدى»، - دەدى دانيا ەسپايەۆا.

ونىڭ ايتۋىنشا، قۇجاتتا ۋاكىلەتتى ۇيىمداردى ليتسەنزيالاۋ ءتارتىبى ناقتىلانعان، سونىمەن بىرگە، ەسەپ بەرۋ مەرزىمىن بۇزعانى ءۇشىن جاۋاپكەرشىلىك ەنگىزىلەدى.

«بارلىق ترانسشەكاارالىق وپەراتسيالاردى تولىق قامتۋ ءۇشىن كليەنتتەردىڭ تاپسىرمالارى بويىنشا جۇرگىزىلەتىن بانكتەردىڭ وپەراتسيالارى عانا ەمەس، سونىمەن قاتار، ۋاكىلەتتى بانكتەردىڭ جەكە وپەراتسيالار جونىندە ۇلتتىق بانككە مىندەتتى تۇردە حاباردار ەتۋ كوزدەلگەن. قارالىپ وتىرعان زاڭ جوباسىندا 15-باپتى ا ح ق و تۋرالى كونستيتۋتسيالىق زاڭنىڭ بەسىنشى بابىنا سايكەس كەلتىرۋ جوسپارلانعان. زاڭدى تۇلعالار رەزيدەنتتەرى ءبىرىنشى تولەم جۇرگىزۋگە دەيىنگى نەمەسە وسىنداي شوتتى پايدالانا وتىرىپ، اقشا اۋدارعانعا دەيىن شوت اشىلعانى تۋرالى ۇلتتىق بانككە حابار بەرۋ مىندەتى بويىنشا وزگەرىستەر ەنگىزىلدى»، - دەدى دانيا ەسپايەۆا.