بۇگىن قازاقستان حالقىنىڭ بىرلىگى كۇنى
دوستىق پەن ءوزارا تۇسىنىستىكتىڭ نىشانىنا بولعان بۇل مەرەكە قازاقستان قوعامىنداعى بىرىكتىرۋشى فاكتورلاردىڭ بىرىنە اينالدى. قازاقستان - مادەنيەتتەرىنىڭ، تىلدەرى مەن داستۇرلەرىنىڭ ءارالۋاندىعى باستى بايلىعىنا اينالعان، ال ازاماتتارى جاسامپازدىق پەن دامۋ يدەياسى اينالاسىندا بىرىككەن ەل. سول تۇرعىدان العاندا 1 - مامىر مەيرامى ەلىمىزدە ۇلتتار مەن ۇلىستاردىڭ دوستىعى مەن تاتۋلىعىنىڭ، ازاماتتىق كەلىسىمنىڭ، ەلىمىزدەگى 130 عا تارتا حالىقتاردىڭ اۋىزبىرلىگىنىڭ جارقىن كورىنىسىن پاش ەتەدى. قازاقستان حالقىنىڭ بىرلىگى مەرەكەسىن جاڭا تۇرپاتتا تويلاۋ قاجەتتىگىن، ونى ەلىمىزدىڭ باستى مەرەكەسىنە اينالدىرۋ يدەياسىن مەملەكەت باسشىسى ن. نازاربايەۆ 2011 -جىلى كوتەرگەن بولاتىن.
«كوكتەمگى 1 - مامىر مەرەكەسى ءبىزدىڭ ەلدەگى ەتنوستاردى بۇرىنعىدان دا جاقىنداستىرا ءتۇسۋى ءتيىس. بۇل ءبىزدىڭ تۋعان قازاقستانىمىزداعى نەگىزگى مەرەكەمىز بولادى. ءبىرىنشى مامىر - بىرلىكتىڭ ەرەكشە مەرەكەسى. سوندىقتان دا، مامىردا تۇتاس اي بويى جاقىنداسۋدىڭ بارلىق جاڭا جولدارىن بايقاپ كورۋ كەرەك. ال تۇراقتىلىق بولماعان جەردە دامۋ دا بولمايتىنىنا قازىرگى جەر جاھاندا ورىن الىپ جاتقان مىسالدار جەتكىلىكتى. سوندىقتان دا، بىرلىكتى تۋ ەتكەن ەلىمىز قازاقستان حالقىنىڭ بىرلىگى كۇنىن باستى مەرەكەلەردىڭ بىرىنە اينالدىرۋدى قولداپ كەلەدى. جۇمىس ىستەۋ قاجەت. ەگەر بارلىق وبلىستاردا تەرەڭىنەن ويلاستىرسا، وتە قىزىقتى شارالار جۇزەگە اساتىن بولادى ءارى مۇنىڭ ەلگە پايداسى دا زور» ، - دەگەن ەدى ەلباسى.
كوپتەگەن ۇلتتاردىڭ ورتاق شاڭىراعىنا اينالعان قازاقستان بەيبىتشىلىك پەن كەلىسىم ارقىلى الەمگە ۇلگىلىك جولدى نۇسقاپ كەلەدى. ايتسە دە، ۇلتارالىق كەلىسىم مەن ءدىنارالىق تاتۋلىقتىڭ التىن بەسىگىن تەربەتۋ اياق استىنان تۋىنداعان نەمەسە قازاق دالاسىندا وزدىگىنەن پايدا بولعان دۇنيە ەمەستىگى بەسەنەدەن بەلگىلى. ەل يەسى، جەر يەسى سانالاتىن قازاق حالقى الماعايىپ زامانداردا شارتاراپتان باس ساۋعالاعان، تاعدىر تالكەگىمەن بوسىپ كەلگەن باسقا جۇرتتى باۋىرىنا باستى. ءوزىنىڭ توز- توزى شىققانىنا قاراماستان، باسقانىڭ قايعىسىنا دا ورتاقتىعىن تانىتتى. كەڭەستىك جۇيە قىسپاعىمەن قازاق دالاسىن پانالاعان بوتەن جۇرت وسىندا ماڭگىلىك تۇراقتاپ قالدى. تاۋەلسىزدىك تۇسىندا دا قىرىقجاماۋداي بولعان ۇلتتىق قۇرامداعى وسى ەرەكشەلىكتى نەگىزگە العاندار «جاڭادان پايدا بولۋى ىقتيمال ۇلكەن قاقتىعىستار الاڭى» رەتىندە قازاق دالاسىن مەڭزەگەن ەدى. الايدا، قازاق حالقىنىڭ دانالىعى، كەڭدىگى مەن سىيلاستىعى ەتنوستىق تەگىنە، الەۋمەتتىك، ءدىني جانە دە شىعۋ تەگىنە قاراماي، جاڭا مەملەكەتتىڭ بارشا ازاماتىنىڭ ۇيىسۋىنا سەبەپشى بولدى.
بۇل كۇندەرى استانا مەن الماتىدا، بارلىق وبلىس ورتالىقتارى مەن اۋدان- اۋىلداردا قازاقستاندىق تولەرانتتىق پەن ىنتىماقتاستىقتى، جاراستىقتى تاتۋ تىرلىكتى پاش ەتكەن شەرۋلەر مەن فەستيۆالدار، ەلىمىزدى مەكەندەيتىن بارلىق ۇلتتاردىڭ ەتنومادەني بىرلەستەستىكتەرىنىڭ ۇيىمداستىرۋمەن باسقا دا مادەني شارالار، سپورت جارىستارى وتەدى.
