تانىمال «ۋولل- ستريت قاسقىرى» الماتىلىقتارعا باي بولۋدىڭ قۇپياسىمەن ءبولىستى
لەوناردو دي كاپريو تۇسكەن مارتين سكورسەزەنىڭ «ۋولل- ستريت قاسقىرى» فيلمىنەن كەيىن تانىمال بولعان دجوردان بەلفورت الماتىدا وتكەن فورۋمدا ەكى ساعات ءسوز سويلەپ، الماتىلىقتارمەن جەتىستىككە جەتۋدىڭ جولدارىمەن ءبولىستى. ول ونىمگە دەگەن سەنىم مەن سەندىرۋ كۇشى جەتىستىكتىڭ كىلتى دەيدى. وسى ەرەجەمەن العا ۇمتىلعان ول وتكەن عاسىردىڭ 90-جىلدارىندا مۋلتيميلليونەرگە اينالعان.
«بىرىنشىدەن، كليەنتپەن سويلەسۋ كەزىندە وعان ۇنايتىن ۇسىنىس جاساۋعا نەبارى 4 سەكۋندىڭىز بار. ءبىز ادامدى ءبىر كورگەننەن تانيمىز جانە وعان نە ۇسىنۋ كەرەك ەكەنىن تۇسىنەمىز. سوندىقتان ونىڭ نازارىن بىردەن اۋدارۋ وتە ماڭىزدى. ەكىنشىدەن، ءوز جۇمىسىڭىزدى قۇلشىنىسپەن ورىنداڭىز. سوندا كليەنت سىزگە سەنىم ارتادى. ۇشىنشىدەن، ءوز سالاڭىزدىڭ مامانى بولىڭىز. ءسىز وزىڭىزگە دەگەن سەنىمىڭىزدى كورسەتە ءبىلىڭىز. سىزگە سەنىم ارتقان ادامنىڭ بار ماسەلەسىن شەشىپ بەرەتىن دەڭگەيدەگى ادام رەتىندە كورىنۋىڭىز كەرەك. بۇگىننىڭ ساتۋشىلارى ءوزى سەنىم ارتقان ونىمدەردى عانا ساتۋى ءتيىس»، - دەيدى دجوردان بەلفورت.
دجوردان بەلفورتتىڭ باي بولۋعا دەگەن تالابى نيۋ- يوركتىڭ كۆينس وكرۋگىندەگى بەيسايد قالاشىعىندا ءومىر سۇرگەن كەزىندە پايدا بولعان. ول مەكتەپتى بىتىرگەن كەزدە دوسىمەن بىرگە جاعاجايدا بالمۇزداق ساتىپ، العاشقى 20 مىڭ ا ق ش دوللارىن تابادى. 23 جاسىندا ەت ساتۋمەن اينالىسىپ، ءوزىنىڭ جەكە كومپانياسىن اشادى. ودان كەيىن بانكروتقا ۇشىرايدى. ءبىراق بەلفورت قۇلشىنىسىن جوعالتپاي، بروكەر بولۋعا بەل بۋادى. وسى ساتتە ول ءوزىنىڭ ناعىز ساتۋشى ەكەنىن تۇسىنەدى. فيلمنىڭ سيۋجەتىنە نازار اۋدارساق، ول ەسىرتكىگە بەرىلىپ، كەيىنگى عۇمىرىن ويىن- ساۋىقپەن وتكىزبەك بولعان. ءبىراق ميلليونەرلەرگە ارزان اكسيالاردى ساتۋ ونىڭ ەڭ باستى قاتەلىگى بولدى. ونىڭ بيزنەسى جۇرمەي، ەشكىم وعان سەنىم ارتپاي قويىپ، اقىرى تۇرمەگە تۇسەدى. ال بوستاندىققا شىققاننان كەيىن وزىنە دەگەن سەنىمىن نىقتاپ، سۇرانىسقا يە بيزنەس- جاتتىقتىرۋشىعا اينالادى.
«فيلم جوعارى دەڭگەيدە تۇسىرىلگەن. ءبىراق تابىسقا جەتۋدىڭ وزگە دە جولدارى بار ەكەنىن ۇعىنۋ كەرەك. تۇرمەگە تۇسكەن ازاماتتاردىڭ باسىم بولىگى كەيىنگى ءومىرىن قايتا قالپىنا كەلتىرە المايدى. بۇل ارينە ماعان قاتىستى ايتىلعان جوق. مەن تۋرالى فيلم ءتۇسىرىلدى. ەكى كىتاپ جازىپ، ءوز تاجىريبەممەن ءبولىسۋ ارقىلى قاراجات تاۋىپ ءجۇرمىن. ەگەر ارزان ەمەس، شىنايى قۇندىلىعى بار اكسيالاردى ساتۋمەن اينالىسقانىمدا، ودان دا كوپ تابىسقا جەتكەن بولار ەدىم. ارزان اكسيالاردى ساتىپ، تەزىرەك تابىسقا جەتكىم كەلدى. جەتتىم دە. ءبىراق بۇل مەنىڭ قاتەلىگىم جانە ومىردەن العان ساباعىم بولدى. ال قازىر بيزنەس- جاتتىقتىرۋشى رەتىندە ادامدارعا بيزنەستى دۇرىس جولمەن قۇرۋدىڭ جولدارىن ۇيرەتىپ كەلەمىن»، - دەيدى بەلفورت.
21 - عاسىردا ادامدار وزدەرى ۇنايتىن ءىستى ىزدەۋگە بەيىمدەلدى. مىسالى، قاراپايىم كەڭسە قىزمەتكەرى ستيليستكە اينالسا، ەشكىم دە تاڭدانبايدى. بەلفورت ءوز ءىسىڭدى سۇيۋدەن بولەك تابىسقا جەتۋدى دە ءبىلۋ قاجەت ەكەنىن ايتادى.
«ەگەر ءسىز وزىڭىزگە ۇنايتىن ىسپەن اينالىسقىڭىز كەلىپ، ءبىراق ول تابىس الىپ كەلمەيتىن بولسا، قوسىمشا تابىس كوزىن ىزدەڭىز. نەمەسە ىشتەي سەنىمسىزدىك پايدا بولماۋى ءۇشىن ءوز ستاندارتتارىڭىزدى تومەندەتىڭىز»، - دەيدى ول.
«ۋولل- ستريت قاسقىرى» فيلمىنىڭ ارقاسىندا ادامدار دجوردان بەلفورتتى «عاسىردىڭ ەڭ ۇلى قارجى الاياعى» اتىمەن كوپكە دەيىن تانيتىن بولادى. ول بالالارى ءۇشىن تۇرمەدەن شىعىپ، ءبارىن قايتا باستاۋعا ءوز بويىنان كۇش تابا الدى. تاعدىردىڭ تالكەگىنە قاراماي، قايتادان تابىستى كاسىپكەرگە اينالىپ، قىزى مەن ۇلىنا قامقور بولا ءبىلدى.
اۆتور: مايا تەنيزبايەۆا
اۋدارعان: جولداس ورىسبايەۆ
