اقتوبەدە ورىس قىزى وزگە ۇلت وكىلدەرىنە قازاق ءتىلىن ۇيرەتىپ ءجۇر
قالاداعى سپيد ورتالىعىنىڭ زەرتحاناشى مامانى نينا نوجەنكينا ۇجىمداعى وزگە ۇلت وكىلدەرىنە قازاق ءتىلىن ۇيرەتىپ ءجۇر. مەملەكەتتىك ءتىلدى مەڭگەرىپ العان ول قازاقتىڭ ۇلتتىق سالت- داستۇرلەرىن دە جاقسى بىلەدى.
نينا نوجەنكينا - اتىراۋ ءوڭىرىنىڭ تۋماسى. قازاقىلىقتىڭ قايماعى بۇزىلماعان اۋىلدا وسكەندىكتەن، قازاقتىڭ ءتىلىن قۇرمەتتەپ، ءداستۇرىن دارىپتەيدى. مەديتسينا سالاسىن تاڭداعان ول بۇگىندە تاجىريبەلى زەرتحاناشى بولدى. سپيد ورتالىعىندا 7 جىلدان بەرى ەڭبەك ەتىپ ءجۇر. ءوز مىندەتى ءوز الدىنا ارىپتەستەرىنە ءتىل ۇيرەتۋدەن دە جالىقپايدى. ال ۇجىم كوپ ۇلتتى.
نينا نوجەنكينا، وبلىستىق سپيد ورتالىعىنىڭ زەرتحاناشى مامانى:
- قازاق ءتىلىن مەكتەپتەن باستاپ، بالا كەزىمنەن باستاپ ۇيرەندىم. بارلىق وتباسىم قازاقشا سويلەيدى. مەن مەكتەپ كەزىندە قازاق تىلىندە وليمپياداعا قاتىستىم، وبلىستىق وليمپياداعا قاتىستىم. ءبىرىنشى مامىر قازاقستان حالقىنىڭ بىرلىگى كۇنىمەن قۇتتىقتايمىن. سىزدەرگە زور دەنساۋلىق، مول باقىت تىلەيمىن! ءارقاشان تاتۋلىقتا، بىرلىكتە بولايىق.
نينا ۇجىمداستارىنىڭ الدىندا دا سىيلى. بارلىق مەرەكەلىك شارالاردىڭ بەل ورتاسىندا جۇرەدى. ۇجىم الدا بولاتىن مەدبيكەلەردىڭ كاسىبي مەرەكەسىنە قىزۋ دايىندالىپ جاتىر. ورتالىقتا 81 ادام ەڭبەك ەتسە، ولاردىڭ 21- ءى - مەدبيكە.
قۇرالاي ساپارعاليەۆا، ورتالىقتىڭ اعا مەدبيكەسى:
- نينا ءوز جۇمىسىنا جاۋاپكەرشىلىكپەن، ۇقىپتىلىقپەن قارايدى. جانە دە نينا بىزدە ناۋرىز مەرەكەلەرىندە قازاقشا سويلەپ، قازاق تىلىندە ءان شىرقاپ، تاقپاقتار ايتادى. ءوز جۇمىسىنا وتە ۇقىپتى، جۇمىسقا جاۋاپكەرشىلىكپەن قارايتىن زەرتحاناشى دەپ ەسەپتەيمىن نينانى.
وڭىردە قازاق ءتىلىن ۇيرەنگىسى كەلەتىن وزگە ۇلت وكىلدەرى كوپ. اسسامبلەيانىڭ قولداۋىمەن اشىلعان «دوستىق ۇيىندە» جىلىنا 500-دەن استام ادام ءتىل سىندىرادى. ودان بولەك 7 ۇلتتىڭ ءتىلىن ۇيرەتەتىن جەكسەنبىلىك مەكتەپ جۇمىس ىستەپ تۇر.
www.24.kz
